UJOROMIYA 35 - IsiNdebele 2012 Translation

AmaRekabi asibonelo ebantwini bakwaJuda

¹ Nanti ilizwi elafika kuJoromiya livela kuSomnini ngesikhathi sokubusa kwakaJehoyakhimu umsa kaJosiya ikosi yakwaJuda, lathi:

² “Khamba uye ebantwini besiqhema samaRekabi ubameme kobana beze kelinye lamalawu angeqadi kwethempeli lakaSomnini bese ubanikela iwayini kobana basele.”

³ Yeke ngakhamba ngayokuthatha uJazaniya umsa kaJoromiya omsa kaRhabatsiniya, abafowabo, abalandeli bakhe boke nesiqhema soke samaRekabi.

⁴ Ngabasa ngethempelini lakaSomnini, ngabangenisa ngelawini lamadodana kaRhanani umuntu kaZimu, umsa kaYigidaliya. Gade kuseqadi kwelawu leenduna ebelingehla kwelakaMaseya umsa kaTjhalumu umlindisango.

⁵ Yeke ngabeka izitja ezizele iwayini kanye neenqoko phambi kwabantu besiqhema samaRekabi ngathi kibo: “Selani nanto iwayini.”

⁶ Kodwana baphendula bathi: “Thina asiseli iwayini ngombana umsunguli wesiqhema sethu, uJonadaba umsa kaRekabi wasiyala wathi, ‘Ningaseli iwayini nina ngitjho neenzukulwana zenu.

⁷ Godu ningakhi iinkumba, nitjale imbewu namkha nibe banini besidiribe. Ningalingi nenze ngitjho nakunye kwalokho, kodwana kumele nihlale ematendeni njalo ukuze niphile isikhathi eside enarheni eniziinkhambi kiyo.’

⁸ Nje-ke, silalele koke umsunguli wesiqhema sethu, uJonadaba umsa kaRekabi, asiyale ngakho. Ngalokho akakho phakathi kwethu, ebafazini bethu ngitjho nemadodanenethu okhe wasela iwayini

⁹ namkha akhe iinkumba kobana ahlale kizo begodu azange sibe nesidiribe, amasimu ngitjho nembewu.

¹⁰ Sihlezi ematendeni begodu silalele ngokuzeleko koke esakuyalwa msunguli wesiqhema sethu, uJonadaba.

¹¹ Kodwana lokha uNebukadiretsari ikosi yeBhabheli nayivimbezela inarha le, thina sathi, ‘Nambani siye eJerusalema sibalekele ibutho lamaKasidi nama-Aramu.’ Kungalokho silokhu siseJerusalemapha.”

¹² Ilizwi lakaSomnini lafika kuJoromiya lathi

¹³ uSomnini uMninimandlawoke, uZimu wakwa-Israyeli uthi: “Khamba uyokubuza abantu bakwaJuda kanye nabantu beJerusalema uthi, ‘Anizukufunda isifundo bese nilalela amezwami na? Kutjho uSomnini.

¹⁴ UJonadaba umsa kaRekabi wayala abalandeli bakhe kobana bangaseli iwayini. Nje-ke umyalo lowo bawugcinile. Bekube namhlanje abaliseli iwayini ngombana balalela umyalo womsunguli wesiqhema sabo. Mina ngikhulume nani imini yoke kodwana khonapho azange beningilalele.

¹⁵ Ngathumela abaphorofidi okuziinceku zami imini yoke kini kobana bathi: Omunye nomunye wenu akatjhuguluke eendleleni zakhe zobukhohlakali bese nilungise nezenzo zenu, ningadlhemadlhemi ngemva kwabosingazimu kobana nibalotjhe. Khona-ke nizakuhlala endaweni engininikela yona kanye naboyihlo. Kodwana azange niyelele namkha ningilalele.

¹⁶ Abalandeli bakaJonadaba umsa kaRekabi babulunge umyalo abawunikelwa msunguli wesiqhema sabo, kodwana nakubabantwaba bona azange bangilalele.

¹⁷ “ ‘Ngalokho nakhu okutjhiwo nguSomnini uMninimandlawoke, uZimu wakwa-Israyeli: Lalelani, sele ngizokwehlisela uJuda nabo boke abahlala eJerusalema yoke ihlekelele engayikhuluma phezu kwabo ngombana ngakhuluma nabo kodwana azange bangilalele, ngababiza kodwana azange basabele.’ ”

¹⁸ Yeke uJoromiya wathi esiqhemeni samaRekabi: “Nakhu okutjhiwo nguSomnini uMninimandlawoke, uZimu wakwa-Israyeli, ‘Njengombana nilalele umyalo womsunguli wesiqhema senu, uJonadaba benabulunga yoke imiyalwakhe begodu nenza koke athe nikwenze,

¹⁹ ngalokho-ke nakhu okutjhiwo nguSomnini, uMninimandlawoke, uZimu wakwa-Israyeli: UJonadaba umsa kaRekabi akasoze atlhoga umuntu ongangilotjha.’ ”