UJOROMIYA 31 - IsiNdebele 2012 Translation

Ithabo lokubuya kwabathunjwa

¹ USomnini uthi: “Ngesikhatheso ngizakuba nguZimu emindeni yoke yakwa-Israyeli begodu izakuba babantu bami.”

² Nakhu okutjhiwo nguSomnini: “Abantu abaphunyurhe esabuleni bazakufumana umusa erhalawumbeni, iye, u-Israyeli usendleleni yokufumana ukuthula kwakhe.

³ USomnini wazibonakalisa ku-Israyeli akude, wathi: Ngikuthande ngethando lanini nanini, ngalokho ngiragele phambili ngokwethembeka kwami kuwe.

⁴ Godu ngizakwakha, nje-ke uzakwakheka, wena tlawu Israyeli! Godu uzazikghabisa ngabosotjherere bakho, uphume uyokugida nabathabileko.

⁵ Godu uzakutjala iindiribe eentabeni zeSamariya; abatjali bazakutjala bebabe ngebokuthoma ekugomeni iinthelo.

⁶ Kuzakuba nelanga lapha abalindi bazakurhuwelela khona eentabeni zakwa-Efrayimu bathi, ‘Yizani sikhuphukeleni eZiyoni, kuSomnini uZimethu.’ ”

⁷ Mbala, nakhu okutjhiwo nguSomnini: “Hlokomani ngethabo kuJakopo, iye, nibethele umphathi wezizwe umkhulungwana, memezelani, nidumise nithi, ‘Sindisa abantu bakho Somnini, iye, imisalela yakwa-Israyeli.’

⁸ Qalani, ngizobakhupha enarheni yetlhagwini, ngibabuthe kusukela emajukujukwini wephasi, phakathi kwabo kube neemphofu nabatlhulezako, abanamasana nabanemirhelo, kube siqubuthu esikhulu, babuyele ekhaya.

⁹ Bazakuza balila, bathandaze. Ngizabarhola, ngibase emilanjaneni enamanzi, nendleleni elelezekileko ukuze bangakhutjwa; Mbala, nginguyise ka-Israyeli, iye, u-Efrayimu lizibulo lami.”

¹⁰ Yizwani ilizwi lakaSomnini nina zizwe, nilimemezele kude emagwini, nithi: “Ohlakaze u-Israyeli uzakubuya ambuthelele, amlinde njengomelusi olinda umhlambakhe.”

¹¹ Mbala, uSomnini uhlawulele uJakopo, wamhlenga ezandleni ezinamandla kunaye.

¹² Bazakubuya bahlokome endundumeni yeZiyoni, bawulukele ebuhleni bakaSomnini, bathabele ikoroyi, iwayini namafutha we-oliva, iimbuzana namakonyana. Ipilwabo izakuba njengesivande esisezelweko, angeze basaphodlheka godu.

¹³ “Ngesikhatheso amatlawu azakujekezela agide, amasokana nabadala bename ndawonye. Ngizakuphendula isililo sabo sibe lithabo, ngibaduduze, ngibaphe itokozo ngaphezu kwesizi labo.

¹⁴ Ngizakusuthisa abaphristi ngamanoni, abantu bami baneliswe ngokuhle kwami.” Kutjho uSomnini.

¹⁵ Nakhu okutjhiwo nguSomnini: “Ilizwi lizwakele eRama, isililo nokurhahlawula okulisizi. URarheli ulilela abantwabakhe, akafuni ukutjhiriywa ngabo ngombana abasekho.”

¹⁶ Nakhu okutjhiwo nguSomnini: “Yewuzibambe, ungalili, bamba neenyembezi emehlwenakho ngombana kunomvuzo ngesizi lakho, wena Rarheli: Abantwabakho bazakubuya bavela enarheni yesitha.

¹⁷ Iye, kunethemba ngengomuso lakho: Bazakubuyela enarhenabo.” Kutjho uSomnini.

¹⁸ “Mbala, ngizwe u-Efrayimu azitlhuwela athi, ‘Ungibethile, ngamukela isibetho njengekunzana engakajayeli ukubotjhelwa. Yewungibuyise, ngizakubuya ngombana wena unguSomnini uZimami.

¹⁹ Ngambala ngemva kokuphambuka kwami, ngazisola; ngemva kobana ngilemuke lokho, ngathwala imikhono ehloko; ngaba neenhloni, ngakhena, iye, bengithwele ihlazo lobutjha bami.’

²⁰ U-Efrayimu yindodanami ethandekako kimi, iye, umntwana othokozelwa nguyise: Njengombana vane ngikhulume ngaye, ngihlala ngimkhumbula. Ngebanga lalokho ihliziywami ibethela eduze ngaye. Mbala, ngizakuba nesisa kuye.” Kutjho uSomnini.

²¹ “Zibekele amatshwayo wendlela, uzenzele imihlahlandlela; beka umkhumbulwakho endleleni ekulu, okuyindlela okhambe ngayo. Yewubuye wena tlawu Israyeli, buyela emadorobhenakho la.

²² Kuzabe kube nini ugida sikhundla sinye, wena ndodakazi eqoqomako? USomnini wenze into etja enarheni: Umfazi uzakugida ngokuzombeleza indoda.”

²³ Nakhu okutjhiwo nguSomnini uMninimandlawoke, uZimu wakwa-Israyeli: “Godu bazakusebenzisa amezwi la enarheni yakwaJuda nemadorobheni wakhona lokha nangitjhugulula ubujamo babo: “ ‘USomnini akubusise, wena buhlalo bokulunga; iye, wena mbundu ocwengileko!’

²⁴ IZiyoni lizakuba likhaya lakaJuda, okutjho woke amadorobhakhe ndawonye, abalimi nabakhamba nemihlambi.

²⁵ Ngizakuphumuza abadiniweko, ngithulise boke abaphodlhekileko.

²⁶ Kungalokho mina Somnini ngasikima, ngayelela ubujamo. Mbala, umnyakami ufikile.”

²⁷ USomnini uthi: “Qalani, isikhathi siyeza, lapha ngizakuzalisa khona inarha ka-Israyeli neyakaJuda ngabantu neenlwana.

²⁸ Njengombana ngiyelele ngabo kobana ngisiphule bengibhuruze, ngigirize, ngitjhabalalise bengehlise ihlekelele, ngokunjalo ngizakuyelela ngabo kobana ngakhe bengitjale.” Kutjho uSomnini.

²⁹ “Emihleni leyo abantu angeze basathi, ‘Abobaba bagome amadiribe angakavuthwa, nje-ke amazinyo wabantwana ayatjhelela.’

³⁰ “Awa, woke umuntu uzakufela icala lakhe, nanyana ngubani ogoma amadiribe angakavuthwa, amazinywakhe azakutjhelela.”

³¹ USomnini uthi: “Qalani, isikhathi siyeza lapha ngizakwenza khona isivumelwano esitjha nekumba ka-Israyeli kanye neyakaJuda.

³² Asizukufana nesivumelwano engasenza naboyise nangibabamba ngesandla kobana ngibakhuphe eGibhide ngombana bona bephula isivumelwano sami, lokha mina nangimphathabo.” Kutjho uSomnini.

³³ “Mbala, nasi isivumelwano engizosenza nekumba ka-Israyeli ngemva kwesikhatheso: Ngizakubeka umthethwami emikhumbulwenabo bese ngiwutlola eenhliziyweni zabo. Ngizakuba nguZimabo, bona babe babantu bami.” Kutjho uSomnini.

³⁴ “Umuntu angeze asafundisa omunye womphakathi namkha umfowabo athi, ‘Yazi uSomnini’ ngombana boke bazabe bangazi, ukusukela komncani kibo ukuya komkhulu.” Kutjho uSomnini. “Mbala, ngizakucolela icala labo ngingasakhumbula izono zabo.”

³⁵ Nakhu okutjhiwo nguSomnini, okunguye obeke ilanga kobana likhanyise emini, noyala inyezi neenkwekwezi kobana ziphazime ebusuku, yena oqubula ilwandle ukuze amagagasalo abhodle, obizwa ngoSomnini uMninimandlawoke

³⁶ uthi: “Nakube izinto engizinzinzisilekwezi ziyanyamalala ebusweni bami, khona-ke neenzukulwana zakwa-Israyeli angeze zisaba sisizwe nini nanini phambi kwami.”

³⁷ Iye, uSomnini uthi: “Nange amazulu ngaphezulu angalinganiseka neensekelo zephasi ngaphasi zihlolisiswe, khona-ke nami ngizakulahla iinzukulwana zakwa-Israyeli ngebanga lakho koke ezikwenzileko.” Kutjho uSomnini.

³⁸ USomnini uthi: “Qalani, isikhathi siyeza lapha idorobheli lizakuvuselelelwa uSomnini: ukusuka epundwini iRhananiyeli ukuya esangweni okuthiwa siKghudlhu,

³⁹ isinqophisamakho sizakunqomba thwi entatjaneni iGarebi bese sijikela eGowa,

⁴⁰ sibambe woke umrhoba, ukunaba kwawo, isikhisi kanye nemiqoqo, ukuya emrhobeni weKhidroni ngepumalanga, ukuyokufika ejikeni lesango iNjomani. Yoke indawo le izakuba ngecwengileko kuSomnini. Idorobho angeze belisasitjhulwa namkha ligirizwe godu nini nanini.”