UJOROMIYA 30 - IsiNdebele 2012 Translation

Isithembiso sokubuyiselwa kwaka-Israyeli noJuda

¹ Nanti ilizwi elafika kuJoromiya livela kuSomnini:

² “Nakhu okutjhiwo nguSomnini, uZimu wakwa-Israyeli, ‘Tlola umsongo ngawo woke amezwi engiwakhulume kuwe

³ ngombana isikhathi siyeza lapha ngizakutjhugulula khona ubujamo babantu bami u-Israyeli noJuda bese ngibabuyisela enarheni engayinikela aboyisemkhulu kobana ibe lilifa labo.’ ” Kutjho uSomnini.

⁴ Naka amezwi akhulunywa nguSomnini malungana no-Israyeli noJuda,

⁵ iye, nakhu okwatjhiwo nguSomnini: “Kuzwakele isililo sokwesaba, ivalo, ingasi ukuthula.

⁶ Buzani bese niyaqala: Indoda ingabeletha abantwana na? Alo, kubayini ngibona enye nenye indoda enamandla ibeke izandla zayo esiswini inga mfazi onemirhele, ithe ngobusokazi obuphaphathekileko na?”

⁷ Maye liyasabeka ilangelo! Alikho elizakufana nalo. Lizakuba sikhathi sesizi kuJakopo, kodwana uzakusindiswa kilo

⁸ ngombana uSomnini, uMninimandlawoke uthi: “Mhlokho ngizakwephula ijogi entanyenakhe, ngidabule iimbopho zakhe; amaphandle angeze asamsebenzisa,

⁹ kodwana uJakopo uzakulotjha uSomnini uZimakhe, asebenzele uDavida ikosakhe engizamvusela yona.”

¹⁰ USomnini uthi: “Wena ncekwami Jakopo, ungabi nevalo; ungapheli amandla wena Israyeli. Qala, sele ngizokusindisa ukude neenzukulwana zakho enarheni ezithunjwe kiyo. UJakopo uzakubuya abe nokuthula, azigedle; kungabi nomuntu ozamethusela.”

¹¹ USomnini uthi: “Mbala, nginawe Jakopo kobana ngikusindise. Ngizakuphelisa izizwe zoke engikuhlakazele phakathi kwazo, kodwana wena angisoze ngakuphelisa. Angeze ngahlala ngingakubethi, kodwana ngizakukhalima ngeswazi elincani.”

¹² Nakhu okutjhiwo nguSomnini: “Ubuhlungu bakho Juda, abupholi, inceba lakho alelapheki.

¹³ Akakho omela indabakho; akunasihlahla sokwelapha inceba, akukho ukupholiswa kwakho.

¹⁴ Zoke iinthandwa zakho zikukhohliwe, azikukhathaleli nakancani. Mbala, ngikubethe iduma lesitha, iye, isibetho sonelunya ngombana icala lakho likhulu, nezono zakho zinengi.

¹⁵ Maye umkhosi owuhlaba ngokurhayilwa kwakho! Ubuhlungu bakho abelapheki ngebanga lobukhulu becala lakho. Iye, ngebanga lobunengi bezono zakho ngenze lokhu kuwe.

¹⁶ Ngalokho-ke boke abakurhiribidelako, bazakurhiribidelwa; woke amanabakho, okutjho elinye nelinye lawo, azakusiwa ekuthunjweni; labo abakuphangako bazakuphangwa nalabo abakudlelezelako bazakudlelezelwa.”

¹⁷ USomnini uthi: “Ngizakubuyisa ikhokho encebeni lakho, ngelaphe amancebakho, ngombana bakubize ngolahlekileko, bathi, ‘SeyiZiyoni nje enganamkhathaleli!’ ”

¹⁸ Nakhu okutjhiwo nguSomnini: “Qalani, sele ngizokutjhugulula ubujamo bamatende kaJakopo, ngibe nezwelo phezu kwamakhayakhe, idorobho lizakuvuselelwa phezu kwequqwalo isigodlo sinzinze endawenaso efaneleko.

¹⁹ Edorobheni nesigodlweni kuzakuzwakala ukuthokoza nomkhosi wehlokomo. Ngizabandisa, abazukuncipha; ngibenze bahlonitjhwe, bangabi ziinceku.

²⁰ Abantwababo bazakuba njengekadeni, umphakathi wabo unzinziswe phambi kwami. Ngizakuhlunguphaza boke ababagandelelako.

^21-22 Umrholabo uzakuba ngomunye wabo, umbusabo uzakuvela hlangana nabo. Ngizamtjhideza, yena asondele kimi ngombana akakho ongagabaza azibandameze kimi. Nina nizakuba babantu bami, mina ngibe nguZimenu.” Kutjho uSomnini.

²³ “Qalani, naso isiwuruwuru sakaSomnini! Sikurhwanta kwetukuthelo kaSomnini, iye, isivunguvungu esikhukhulako! Sizakuvunguzela phezu kweenhloko zabakhohlakeleko.

²⁴ Itukuthelo evuthako yakaSomnini angeze yahlehla angakafezi iinhloso zehliziywakhe. Emalangeni ezako nizakuzwisisa.”