UJOROMIYA 29 - IsiNdebele 2012 Translation

Incwadi eya kubathunjwa eBhabheli

¹ Naka amezwi wencwadi umphorofidi uJoromiya ayithumela aseJerusalema iya kubaphathi abasala ekuthunjweni kanye nakubaphristi, abaphorofidi nabo boke abantu uNebukadinetsari abathatha eJerusalema wabasa ekuthunjweni eBhabheli.

² Wathumela incwadi le ngemva kobana kususwe eJerusalema ikosi uKoniya, indlovukazi neenkhulu zesigodlo, abarholi bakwaJuda nebeJerusalema, abososino kanye nabakhandisimbi, basiwa ekuthunjweni.

³ Incwadi leyo yathunyelwa ngo-Elasa umsa kaTjhafani noGemariya umsa kaRhilikhiya abathunywa nguTsedekhiya ikosi yakwaJuda ekosini uNebukadinetsari eBhabheli. Beyifundeka bunjesi:

⁴ Nakhu okutjhiwo nguSomnini uMninimandlawoke, uZimu wakwa-Israyeli kibo boke labo engabathatha eJerusalema ngabasa ekuthunjweni eBhabheli:

⁵ “Yakhani iinkumba nihlale lapho. Tjalani iimvande nigome iinthelo zakhona.

⁶ Thathani abafazi nibelethe amadodana namadodakazi. Thathelani amadodanenu abafazi nendise namadodakazenu ukuze nabo babelethe amadodana namadodakazi. Yandani ngesibalo lapho, ninganciphi.

⁷ Godu funani ihlalohle yedorobho enginise kilo ekuthunjweni. Lithandazeleni kuSomnini ngombana nalinehlalohle, nani nizakuba nehlalohle.”

⁸ Mbala, nakhu okutjhiwo nguSomnini uMninimandlawoke, uZimu wakwa-Israyeli: “Ningavumi ukukhohliswa baphorofidi nezangoma eziphakathi kwenu. Ningalaleli ababhudangi enibakhuthaze kobana babhudange.

⁹ Mamala kwaphela abakuphorofida kini ngebizo lami. Azange ngibathume.” Kutjho uSomnini.

¹⁰ Nakhu-ke okutjhiwo nguSomnini: “Nasele iBhabheli iqede iminyaka ematjhumi alikhomba, ngizanitjheja ngifeze isithembiso sami somusa, nginibuyisele endaweni le.

¹¹ Mbala, mina ngiyawazi amahlelo enginawo ngani.” Kutjho uSomnini. “Amahlelo wehlalohle ingasi wokumbi; iye, amahlelo wokunipha ingomuso nethemba.

¹² Yeke nizangibiza, nize nizokuthandaza kimi, nje-ke ngizanilalela.

¹³ Naningifunako nizangifumana nakube ningitjhisakalela ngeenhliziyo ezipheleleko.

¹⁴ Ngizakwenza bona ningifumane.” Kutjho uSomnini. “Ngizakutjhugulula ubujamo benu.

¹⁵ Nina nithe, ‘USomnini usivusele abaphorofidi eBhabheli,’

¹⁶ kodwana nakhu okutjhiwo nguSomnini ngekosi ehlezi esihlalweni sobukhosi bakaDavida kanye nakibo boke abantu abasedorobheneli, abantu bekhenu abangazange bakhambe nani ekuthunjweni,

¹⁷ iye, uSomnini uMninimandlawoke uthi: Qalani, sele ngizokuthumela isabula, indlala namatshwenyeko hlangana nabo begodu ngizabenza bafane namakhiwani abolileko, asele amambi, angasagomeki.

¹⁸ Ngizabagijimisa ngesabula, ngendlala nangamatshwenyeko bengibenze babe sisethuso kiyo yoke imibuso yephasi bebabe sithuko nesimanga, iye, into yokurarekelwa neyokurhubutjhwa hlangana nazo zoke izizwe lapha ngizabaqotjhela khona

¹⁹ ngombana azange balalele amezwami.” Kutjho uSomnini. “Iye, amezwi engibathumele wona ngeenceku zami abaphorofidi imini yoke. Nani bathunjwa azange ningilalele.” Kutjho uSomnini.

²⁰ “Ngalokho-ke, yizwani ilizwi lakaSomnini noke nina bathunjwa engibasuse eJerusalema ngabasa eBhabheli.”

²¹ Nakhu okutjhiwo nguSomnini uMninimandlawoke, uZimu wakwa-Israyeli ngo-Arhabi umsa kaKholaya kanye noTsedekhiya umsa kaMaseya, abaphorofida amala kini ngebizo lami: “Qalani, sele ngizobanikela kuNebukadiretsari ikosi yeBhabheli, yena-ke uzababulalela phambi kwamehlwenu.

²² Okuzakwenzeka kibo kuzakusetjenziswa njengesithuko ngibo boke abathunjwa bakwaJuda abaseBhabheli. Bazakuthi, ‘Inga uSomnini angakwenza ube njengoTsedekhiya no-Arhabi abakhanzingwa yikosi yeBhabheli emlilweni’

²³ ngombana benze ubuhlola kwa-Israyeli bebahlobonga nabafazi babantu bekhabo, bakhuluma amala ebizweni lami ngingakabathumi. Ngimi owaziko nonobufakazi balokho.” Kutjho uSomnini.

Incwadi kaTjhemaya

²⁴ Tjela uTjhemaya umNerhelamu lokhu:

²⁵ Nakhu okutjhiwo nguSomnini uMninimandlawoke, uZimu wakwa-Israyeli: “Nguwe ogunyaze incwadi ethunyelwe kibo boke abantu abaseJerusalema nakumphristi uZefaniya umsa kaMaseya nakibo boke abaphristi wathi,

²⁶ ‘NguSomnini ngokwakhe okwenze umphristi esikhundleni somphristi uJehoyada ukuze kube nabatjheji ethempelini lakaSomnini abazokulawula woke umuntu ohlanyako ozenza umphorofidi, bamfake amakhamandela nesirholwani sesimbi.

²⁷ Alo, kubayini ungazange ukhalime uJoromiya we-Anatothi ozenza umphorofidi kuwe na?

²⁸ Angithi usithumele incwadi eBhabheli wathi: Kuzakuthatha isikhathi eside; nje-ke yakhani iinkumba nihlale kizo; tjalani iimvande nigome iinthelo zakhona.’ ”

²⁹ Umphristi uZefaniya wafunda incwadi le eendlebeni zomphorofidi uJoromiya.

³⁰ Nje-ke ilizwi lakaSomnini lafika kuJoromiya lathi:

³¹ “Thumela ilizwi kibo boke abathunjwa uthi, ‘Nakhu okutjhiwo nguSomnini mayelana noTjhemaya umNerhelamu: Ngebanga lokobana uTjhemaya uphorofide kuwe, nanyana bengingakamthumi, wakuwunga kobana wethembele emaleni,

³² ngalokho, nakhu-ke okutjhiwo nguSomnini: Qalani, sele ngizokuhlunguphaza uTjhemaya umNerhelamu kanye neenzukulwana zakhe. Akazukuba nomuntu omphilelako phakathi kwabantu abaseBhabheli begodu akazukubona ubuhle engizabenzela abantu bami ngombana uhlohlozele bona kuhlubukwe uSomnini.’ ” Kutjho uSomnini.