UJOROMIYA 28 - IsiNdebele 2012 Translation

URhananiya ujamelana noJoromiya

¹ Enyangeni yesihlanu emnyakeni wona lowo, okumnyaka wesine wokubusa kwakaTsedekhiya ikosi yakwaJuda bengingethempelini lakaSomnini, umphorofidi uRhananiya umsa ka-Azuri obegade avela eGibiyoni, wangitemeleja ngiphambi kwabaphristi nabantu boke, wathi:

² “Nakhu okutjhiwo nguSomnini uMninimandlawoke, uZimu wakwa-Israyeli, ‘Ngizakwephula ijogi lekosi yeBhabheli.

³ Eminyakeni emibili yoke swana, ngizakubuyisela endaweni le yoke ipahla yethempeli lakaSomnini eyasuswa endaweni le nguNebukadinetsari ikosi yeBhabheli wayisa eBhabhelapho.

⁴ Godu ngizakubuyisela endaweni le uKoniya umsa kaJehoyakhimu ikosi yakwaJuda kanye nabo boke abathunjwa bakwaJuda abaya eBhabheli ngombana ngizakwephula ijogi lekosi yeBhabheli.’ ” Kutjho uSomnini.

⁵ Nje-ke umphorofidi uJoromiya waphendula umphorofidi uRhananiya phambi kwabaphristi nabo boke abantu ebegade bajame ngethempelini lakaSomnini,

⁶ wathi: “Amen! Inga uSomnini angenza njalo! Iye, inga uSomnini angazalisa amezwi wesiphorofido sakho ngokubuyisa endaweni le ipahla yethempeli lakaSomnini eBhabheli kanye nabo boke abathunjwa.

⁷ Nokho-ke lalela nanti ilizwi engizolitjho eendlebeni zakho naphambi kwabantwaba boke nje.

⁸ Emihleni yaphambilini abaphorofidi abakhambe phambi kwami nawe baphorofida ngepi, ngehlekelele nangamatshwenyeko phezu kwamazwe amanengi ngokujamelana nemibuso emikhulu.

⁹ Kodwana umphorofidi ophorofida okuhle uzakwaziwa njengomphorofidi othunywe nguSomnini ngeqiniso, nakube iimphorofido zakhe ziyazaliseka.”

¹⁰ Yeke umphorofidi uRhananiya wasusa isikeyi entanyeni yomphorofidi uJoromiya wasephula,

¹¹ wathi phambi kwabantu boke: “Nakhu okutjhiwo nguSomnini, ‘Ngaleyondlela ngizakwephula ijogi lakaNebukadinetsari, ikosi yeBhabheli eentanyeni zazo zoke izizwe eminyakeni emibili yoke swana.’ ” Ngemva kwalokho umphorofidi uJoromiya wangena indlela.

¹² Kwathi bona umphorofidi uRhananiya ephule isikeyi entanyeni yomphorofidi uJoromiya, ilizwi lakaSomnini lafika kuJoromiya godu lathi:

¹³ “Khamba ufese utjele uRhananiya bonyana nakhu okutjhiwo nguSomnini, ‘Wephule iinkeyi zesigodo, kodwana esikhundleni sazo ngizokwenza iinkeyi zesimbi.’

¹⁴ Mbala, nakhu okutjhiwo nguSomnini uMninimandlawoke, uZimu wakwa-Israyeli, ‘Ngizakubeka ijogi lesimbi eentanyeni zazo zoke izizwezi ukuze zisebenzele uNebukadinetsari ikosi yeBhabheli, iye, zizamsebenzela begodu ngizamnikela ngitjho neenlwana zommango.’ ”

¹⁵ Yeke umphorofidi uJoromiya wathi kumphorofidi uRhananiya: “Lalela lapha wena Rhananiya! USomnini akakakuthumi, kodwana wena uyenge isizwesi kobana sethembe amala.

¹⁶ Ngalokho-ke nakhu okutjhiwo nguSomnini, ‘Sengizakususa endawenakho. Khona nonyaka nje uzokufa ngombana uhlohlozele bona kuhlubukwe uSomnini.’ ”

¹⁷ Enyangeni yekhomba emnyakeni wona lowo, umphorofidi uRhananiya wahlongakala.