UJOROMIYA 25 - IsiNdebele 2012 Translation

Iminyaka elikhomba yokuthunjwa

¹ Ngomnyaka wesine wokubusa kwekosi uJehoyakhimu umsa kaJosiya ikosi yakwaJuda, okumnyaka wokuthoma wokubusa kwakaNebukadiretsari ikosi yeBhabheli, kwafika ilizwi kumphorofidi uJoromiya malungana nabo boke abantu bakwaJuda.

² Umphorofidi uJoromiya walikhuluma kibo boke abantu bakwaJuda nakibo boke abahlali beJerusalema.

³ Sele kuminyaka ematjhumi amabili nantathu ilizwi lakaSomnini lisiza kimi; iye, ukusukela emnyakeni wetjhumi nantathu wokubusa kwekosi uJosiya umsa ka-Amoni wakwaJuda bekube kunamhlanje. Bengilikhuluma kini imini yoke, kodwana azange nilalele.

⁴ Nanyana uSomnini bekaseze anithumelela zoke iinceku zakhe okubaphorofidi, imini yoke, azange nilalele namkha nikotakote iindlebe zenu kobana nizwe

⁵ lokha nabathi: “Phendukani khona nje, omunye nomunye wenu, nitjhiye indlelenu embi kanye nezenzo zenu zobukhohlakali, khona nizakuhlala enarheni uSomnini aninikele yona kanye nabokhokho benu kusukela ekadeni bekube nini nanini.

⁶ Ningadlhemadlhemi ngemva kwabosingazimu kobana nibalotjhe benibakhothamele. Ningangithukuthelisi ngemisebenzi yezandla zenu. Yeke angeze nganikhubaza.”

⁷ USomnini uthi: “Khonapho azange ningilalele. Ngalokho ningithukuthelisile ngemisebenzi yezandla zenu nazibangela ukukhubala.”

⁸ Ngalokho-ke nakhu okutjhiwo nguSomnini uMninimandlawoke: “Ngebanga lokungalaleli kwenu amezwami,

⁹ qalani, sele ngizokuthumela bona kulandwe zoke iinkoro zetlhagwini, ngitjho nencekwami uNebukadiretsari ikosi yeBhabheli. Ngizaziletha enarheni le nakubahlali bayo kanye nebantwini boke abayizombileko. Ngizobarhayila nya bengibenze into yokurarekelwa nenarha le ibe libhudu namarubhi mlibe.” Kutjho uSomnini.

¹⁰ “Ngizakususa phakathi kwabo itjhada lokujabula nokujekezela, ilizwi lomkhwenyana nephimbo lomlobokazi, itjhada lamatje wokugaya kanye nomkhanyo wesibani.

¹¹ Yoke inarha le izakuba marubhi nebhudu. Abantwaba bazakusebenzela ikosi yeBhabheli iminyaka ematjhumi alikhomba.

¹² Ngemva kokuphelela kweminyaka ematjhumi alikhomba, ngizakuhlunguphaza ikosi yeBhabheli kanye nesizwe sakhona ngebanga lecala labo; iye, inarha yamaKasidi ngizoyenza amarubhi wamlibe.” Kutjho uSomnini.

¹³ “Ngizakwehlisela phezu kwenarha leyo woke amagama engiwakhulume ngayo; iye, woke amagama wena Joromiya ozakuphorofida ngawo ngokujamelana nazo zoke izizwe nazakutlolwa emsongweni.

¹⁴ Izizwe ezinengi namakhosi adumileko azakwenza amaKasidi abe makhoboka. Mina-ke ngizawakhokhela ngokuya ngezenzo kanye nemisebenzi yezandla zawo.”

Ikapho yetukuthelo kaZimu

¹⁵ Ngalokho uSomnini uZimu wakwa-Israyeli wathi kimi: “Thatha ikapho yewayini le, okulilaka esandleni sami bese useza zoke izizwe engikuthuma kizo.

¹⁶ Zizakusela bezitherezele bese zidlharuma ngebanga lesabula engiyithumela hlangana nazo.”

¹⁷ Yeke ngathatha ikapho esandleni sakaSomnini ngaseza zoke izizwe uSomnini angithume kizo:

¹⁸ iJerusalema namadorobho wakwaJuda, amakhosi kanye neenkhulu zakhona kobana ngiwenze into yokukakamalelwa neyesithuko, into yokurarekelwa nokunikelela (njengombana kunjalo nanamhlanjesi);

¹⁹ uFaro ikosi yeGibhide, iinsebenzi zakhe, iinkhulu zakhe, boke abantu bakhe

²⁰ nabo boke abantu abayicubevange yakhona; woke amakhosi wenarha ye-Utsi; woke amakhosi wenarha yamaFilista, okutjho i-Atjhikheloni, iGaza, i-Ekhironi kanye nemisalela ye-Atjhidodi;

²¹ abantu be-Edomu, beMowabi kanye nama-Amoni;

²² woke amakhosi weTirosi, woke amakhosi weTsidoni namakhosi weligwini ngaphetjheya kwelwandle;

²³ abantu beDedani, beTema, beBhuzi nabantu boke abagude iinhloko zabo eenhlafunyweni,

²⁴ woke amakhosi we-Arabhiya newecubevange yabantu abahlala erhalawumbeni;

²⁵ woke amakhosi weZimri, woke amakhosi we-Elamu nawo woke amakhosi weMediya;

²⁶ woke amakhosi wetlhagwini, kude neduze, ngokulandelana kwawo, nayo yoke imibuso yelizwe esebusweni bephasi. Ngemva kwayo kuzakusela ikosi yeTjhetjhaki.

²⁷ Yeke uSomnini wathi kimi: “Kumele uthi kizo, ‘Nakhu okutjhiwo nguSomnini uMninimandlawoke, uZimu wakwa-Israyeli: Selani, nidakwe benihlanze, niwe beningasavuka ngebanga lesabula engiyithumela phakathi kwenu.’

²⁸ “Nakube abafuni ukwamukela ikapho esandleni sakho kobana basele, yeke uzakuthi kibo, ‘Nakhu okutjhiwo nguSomnini uMninimandlawoke: Nakukusela khona, nizakusela!

²⁹ Qalani, ngithoma ukuletha ihlekelele phezu kwedorobho elibizwa ngami; alo, ningakghona njani nina ukubalekela isibetho na? Angeze nahlala ningabethwa ngombana ngiletha isabula ngokujamelana nabo boke abantu ephasinapha.’ Kutjho uSomnini uMninimandlawoke.

³⁰ “Ngalokho wena Joromiya, uzakuphorofida kibo woke amezwi lawo begodu uthi kibo, “ ‘USomnini uzakubhodla asekuphakameni, akhulume ngelizwi lakhe asendawenakhe ecwengileko, uzakubhodla khulu ngokujamelana nomzakhe; arhuwelele njengalabo abagadanga amadiribe, ngokujamelana nabo boke abahlali bephasini,

³¹ itjhada lizakuzwakala epelazwe ngombana uSomnini unesimangalo ngezizwe, ugweba inyama yoke begodu iinkhohlakali uzazinikelela ngesabula.’ ” Kutjho uSomnini.

³² Nakhu okutjhiwo nguSomnini uMninimandlawoke: “Qalani, ihlekelele iphuma ukusuka esizweni ukuya kesinye, kuvuka isiwuruwuru esikhulu ukusuka emajukujukwini wephasi!”

³³ Labo abamadlhwe nguSomnini mhlokho bazakunabela ukusuka emaphethelweni wephasi ukuya kamanye. Abazukulilelwa namkha babuthwe namkha babulungwe, kodwana bazakuba njengomsuqwa emasimini.

³⁴ Lilani nina belusi, nirhahlawule! Zibhudabhudeni emlotheni nina banini bemihlambi ngombana amalangenu wokuhlaba aphelile! Nizakuwa niphahlazeke njengesitja sekhethelo.

³⁵ Abelusi bazakutlhoga ububalekelo nabanini bemihlambi angeze baphunyurha.

³⁶ Yizwani isililo sabelusi nokurhahlawula kwabanini bemihlambi! USomnini wonakalisa amadlelwabo;

³⁷ iye, imirhula ethulileko iyonakaliswa ngebanga letukuthelo evuthako kaSomnini.

³⁸ Utjhiye idzaba lakhe njengebhubezi ngombana inarhabo ibe libhudu ngebanga lokuba nesihluku kwesabula, nangebanga letukuthelo evuthako kaSomnini.