UJOROMIYA 22 - IsiNdebele 2012 Translation

¹ Nakhu okutjhiwo nguSomnini: “Joromiya, yehlela esigodlweni sekosi yakwaJuda ufese umemezele umlayezo lo.

² Yithi ekosini, ‘Lalela ilizwi lakaSomnini wena kosi yakwaJuda ehlezi esihlalweni sobukhosi bakaDavida, wena oneenduna zakho nabantu bakho bangena ngamasango la.

³ Nakhu okutjhiwo nguSomnini: Yenzani okulungileko nokufaneleko. Yenyelani odlelezelweko esandleni somgandelelakhe. Ningahlukumezi namkha nikhahlameze isikhonzi, intandani nomhlolokazi begodu ningathululi iingazi ezinganamlandu endaweni le.

⁴ Ngambala nakube niyelela ukwenza imiyalo le, khona-ke amakhosi ahlala esihlalweni sobukhosi bakaDavida azakungena ngamasango wesigodlwesi, akhwele iinkarana neenjomani, aphekelelwa ziinduna zawo kanye nabantu bawo.

⁵ Kodwana naningalaleli imiyalo le, ngiyafunga ngithi isigodlwesi sizakuba yiququ.’ ” Kutjho uSomnini.

⁶ Mbala, nakhu okutjhiwo nguSomnini ngesigodlo sekosi yakwaJuda: “Nanyana wena sigodlo ufana neGiliyadi kimi, unjengesiqongolo seLibhanoni, ngiyafunga ngithi ngizakwenza ube lirhalawumba, iye, iqubi leququ elingahlalwako.

⁷ Ngizakuhlela abarhayili kobana balwe nawe, omunye nomunye ngeenkhali zakhe, bazakugawula imisedarakho ekhethekileko bayiphosele emlilweni.”

⁸ “Izizwe ezinengi zizakudlula edorobheneli, zibuzane zithi, ‘Kubayini uSomnini enze into enjengale edorobheni elikhulu kangaka?’

⁹ Ipendulo izakuthi, ‘Kungebanga lokobana abantu balo bahlubuke isivumelwano sakaSomnini uZimabo balotjha bebakhothamela abosingazimu.’ ”

¹⁰ Ningalileli ikosi ehlongakeleko ningazwelani nayo, kungaba ngcono nililele loyo osekuthunjweni, ngombana akasoze asabuya namkha abone inarha yekhabo godu.

¹¹ Ngambala nakhu okutjhiwo nguSomnini ngoTjhalumu umsa kaJosiya owaba yikosi ngemva koyise ikosi yakwaJuda kodwana wasuka endaweni le: “Angeze asabuya.

¹² Uzakufela endaweni lapha athunjelwe khona; angeze asayibona inarha le godu.”

¹³ “Uzazizwa owakha isigodlo sakhe ngokungalungi namalawu wakhe aphezulu ngokungakafaneli, asebenzise abantu bekhabo ngelize, angabakhokheli ngomsebenzabo.

¹⁴ Uzazizwa othi, ‘Ngizazakhela isigodlo esivulekileko, sibe namalawu amakhulu phezulu’, asenzele amafesidere amakhulu, asinameke ngomsedari, abe asikghabise ngokubomvu.

¹⁵ “Kukwenza ube yikosi ukutjhisakalela iingodo zemisedari na? Uyihlo waneliswa kukudla nokuselwako, wenza okufaneleko nokulungileko. Nje-ke, koke kwamkhambela kuhle.

¹⁶ Watjheja indaba yabadududu nabaswelako, ngalokho koke kwakhamba kuhle. Leyo akusiyo indlela yokungilandela na?” Kutjho uSomnini.

¹⁷ “Kodwana amehlwakho nehliziywakho inamathele kwaphela ekuzuzeni ngokungakafaneli, ekuthululeni iingazi ezinganamlandu nekugandeleleni nekudlelezeleni.”

¹⁸ Ngalokho nakhu okutjhiwo nguSomnini ngoJehoyakhimu umsa kaJosiya ikosi yakwaJuda: “Abazumlilela bathi, ‘Maye mfowethu! Maye dadwethu!’ Abazomlilela bathi, ‘Maye ngekosethu! Maye ngengwenyama!’

¹⁹ Uzakungcwatjwa njengodumbana, arhurhubiswe ayokuphoselwa ngaphandle kwamasango weJerusalema.”

²⁰ “Khuphukela eLibhanoni, urhuwelele, iphimbo lakho alizwakale eBhatjhani, rhuwelela use-Abarimu, ngombana zoke iinthandwa zakho ziyaqhotjozwa.

²¹ Ngakuyelelisa lokha nawuzizwa uvikelekile, kodwana wena wathi, ‘Angizukulalela!’ Bewuseze uphila ngalendlela kwebutjheni bakho; azange ukhe ungilalele.

²² Ummoya uzokuphephula boke abangani bakho bese iinthandwa zakho ziya ekuthunjweni. Nje-ke uzakurhubutjhwa bewuhlaziswe ngebanga labo boke ubukhohlakali bakho.

²³ Wena mfazi ohlala eLibhanoni, wena onesihlakana emisedarini, uzakububula lokha nawehlelwa ziinhlabi, iye, imirhelo efana neyokubeletha!”

²⁴ USomnini wathi: “Ngiyafunga ngithi, ‘Wena Koniya msa kaJehoyakhimu ikosi yakwaJuda, nanyana bewuyidzilamnwana yesigibo esidleni sami, bengizakukhwamula lapho.

²⁵ Ngizakunikela ezandleni zalabo abazumana nepilwakho, labo obesabako; iye, esandleni sakaNebukadiretsari ikosi yeBhabheli nesandleni samaKasidi.

²⁶ Wena nonyoko owakubelethako ngizanifuthela kenye inarha eningayaziko; nizakufela lapho.

²⁷ Iye, inarha abomele ukubuyela kiyo kangaka le, abasoze babuyela kiyo.’ ”

²⁸ Indoda le nguKoniya odelelekileko, imbiza eyephuliweko, okuyinto engafunwako na? Kubayini yena nabantwabakhe bafuthelwe kude, bajikijelwa enarheni abangayaziko na?

²⁹ Wena narha, narha-ke, narha, lalela ilizwi lakaSomnini!

³⁰ Nakhu okutjhiwo nguSomnini: “Tlolani umuntu lo njengonganamntwana, indoda engeze yaphumelela emihlenayo ngombana esizukwalaneni sayo akakho noyedwa ozayelama ahlale esihlalweni sobukhosi bakaDavida namkha abuse kwaJuda godu.”