UJOROMIYA 21 - IsiNdebele 2012 Translation

UZimu wala isibawo sakaTsedekhiya

¹ Ilizwi lafika kuJoromiya livela kuSomnini lokha ikosi uTsedekhiya nagade athumele uPhatjhirhuri umsa kaMalikiya kanye nomphristi uZefaniya umsa kaMaseya kuye. Bathi:

² “Sibuzela khona nje kuSomnini ngombana uNebukadiretsari ikosi yeBhabheli iyasisahlela. Mhlamunye uSomnini angasenzela iimangaliso zakhe ukuze uNebukadiretsari lo asisuduke.”

³ Nje-ke uJoromiya wabaphendula wathi: “Tjelani uTsedekhiya bonyana

⁴ nakhu okutjhiwo nguSomnini uZimu wakwa-Israyeli, ‘Sele ngizokuphendulela ngakini iinkhali zepi eniziphethekwezo nenizisebenzisela ukulwa nekosi yeBhabheli kanye namaKasidi agege nomthangala ngaphandle kobana anivimbezele. Ngizawaletha ngaphakathi kwedorobheli.

⁵ Mina ngokwami ngizakulwa nani ngengalo eyeluliweko nangesiphanga, iye, ngetukuthelo, ngelaka nangobukhali obukhulu.

⁶ Ngizakumadlha abahlali bedorobheli. Abantu neenlwana bazakubulawa matshwenyeko asabekako.

⁷ Ngemva kwalapho, ngizakunikela uTsedekhiya ikosi yakwaJuda esandleni sakaNebukadiretsari ikosi yeBhabheli. Godu ngizakunikela iinduna zakhe kanye nabantu abangedorobheneli abasinde ematshwenyekweni, esabuleni nendlaleni, ezandleni zezitha zabo, iye, kilabo abazumana nepilwabo. Yona izababulala ngesabula, angeze ibababalele, irhawuke namkha ibazwele ubuhlungu.’ Kutjho uSomnini.

⁸ “Godu tjela isizwesi bonyana nakhu okutjhiwo nguSomnini, ‘Qalani, ngibeka phambi kwenu indlela yokuphila neyokufa:

⁹ Nanyana ngubani ohlala ngedorobheneli uzakubulawa ngesabula, ngendlala namkha ngamatshwenyeko. Kodwana nanyana ngubani ophumako bese azinikele kumaKasidi anivimbezeleko la, uzakuphila, asindise ipilwakhe.

¹⁰ Mbala, ngihlele ukwenza umonakalo phezu kwedorobheli, ingasi ubuhle. Lizokunikelwa esandleni sekosi yeBhabheli, yona izalirhayila ngomlilo.’ ” Kutjho uSomnini.

Iimphorofido ngokujamelana namakhosi wakwaJuda

¹¹ Nanzi iimphorofido mayelana nekumba yobukhosi bakwaJuda: Lalelani ilizwi lakaSomnini

¹² nina kumba kaDavida! Nakhu okutjhiwo nguSomnini: “Gwebani ngokulunga ekuseni, nenyele odlelezelweko esandleni saloyo omgandelelako. Nakungasinjalo, itukuthelwami izakuqubuka ngebanga lobumbi enibenzileko, itjhise njengomlilo kungabi nomcimi.

¹³ Qalani, ngijamelene nani, nina enihlala emrhobeni phezu kwedwala lommango othabaleleko.” Kutjho uSomnini. “Iye, nina enithi, ‘Ngubani ongewuka ajamelane nathi angene emadzabenethu na?’

¹⁴ Ngizanihlunguphaza ngokufanelene nezenzo zenu, kutjho uSomnini. Ngizakuthungelela umlilo emahlathini wedzaba lenu uqothule koke okulizombileko.”