UJOROMIYA 2 - IsiNdebele 2012 Translation

Ama-Israyeli ahlubuka uZimu

¹ Ilizwi lakaSomnini lafika kimi lathi:

² “Khamba ufese umemezele kilo iJerusalema uthi, nakhu okutjhiwo nguSomnini, “ ‘Ngikhumbula ukwethembeka kwakho usesemutjha, ithando lakho usesemlobokazi, ungilandela erhalawumbeni, enarheni engatjalwa litho.

³ U-Israyeli gade acwengile kuSomnini, asilumo sakhe seenthelo zesivuno. Boke abahlephula kiso baba nomlandu, behlelwa yihlekelele.’ ” Kutjho uSomnini.

⁴ Yizwa ilizwi lakaSomnini wena kumba kaJakopo, noke nina nkoro zekumba ka-Israyeli.

⁵ Nakhu okutjhiwo nguSomnini: “Aboyihlo bangisoleni kobana bangabeze badede kimi na? Badlhemadlhema ngemva kwezinto ezililize nabo bagcina sele balilize.

⁶ Azange bebabuze bathi, ‘Uphi uSomnini owasikhupha eGibhide wasirhola erhalawumbeni, enarheni yebhudu namadonga okuyinarha yesomiso neyethunzi elesabekako nengahlalwa muntu na?’

⁷ Ngimi enganiletha enarheni evundileko, kobana nizikholise ngeenthelo namanandi wakhona. Kodwana nathi naningenako nasilaphaza inarhami, nenza ilifa lami laba sinyenyiso.

⁸ Abaphristi azange bebabuze bathi, ‘Uphi uSomnini!’ Labo abafundisako azange bangazi, abelusi bangihlubuka. Abaphorofidi baphorofida ngoBhali, badlhemadlhema ngemva kwezinto ezinganabubhadekelo.”

⁹ USomnini uthi: “Ngalokho godu ngiyanimangalela, iye, ngimangalela iinzukulwana zenu.

¹⁰ Yamelani eligwini leKitimi, niqale, thumelani eKhedari, niyelele kuhle: Into enjengale yakhe yenzeka na?

¹¹ Isizwe siyenana ngabozinyana baso, ngitjho nanyana bangasi nguZimu wamambala na? Kodwana abantu bami bona napa, benana uZimu oyiphazimulwabo ngezinto ezinganabubhadekelo!

¹² Rareka wena zulu, ukhene bewumangale khulu!” Kutjho uSomnini.

¹³ “Mbala abantu bami benze izinto ezimbi ezimbili: Bangihlubukile mina, iye, mina mthombo wokuphila, bazembela imiphathamanzi, imiphathamanzi esasambileko engeze yamumatha amanzi!

¹⁴ “U-Israyeli lo ulikhoboka, iye, likhoboka lokubelethwa na? Alo, kubayini-ke selaphenduke ipango?

¹⁵ Amabhubezi abhodle phezu kwakhe, iye, abhodle ngelizwi elikhulu. Enze inarhakhe yaba libhudu, imizakhe irhayiliwe, ayinabahlali.

¹⁶ Amadoda weMemfisi neweTarhipanirhesi adle woke amadlelwakho.

¹⁷ Awukazidoseli amanzi ngomsele lokha nawufulathela uSomnini uZimakho nakurhola endleleni na?

¹⁸ Alo, uzakuzuzani endleleni eya eGibhide, kobana uyokusela amanzi weTjhirhori na? Uzakuzuzani endleleni eya e-Asiriya kobana uyokusela amanzi eYufrathe na?

¹⁹ Ubukhohlakali bakho buzakuhlunguphaza, ukuhlubuka kwakho kukukhalime. Yelela-ke ulemuke kobana kumbi begodu kumunyu nawuhlubuka uSomnini uZimakho, iye, nangingasakwenzi kobana ungesabe.” Kutjho uSomnini uSomandla onguMninimandlawoke.

²⁰ “Wephula ijogi lakho kade, wadabula nemitja yakho, wathi, ‘Angizukulotjha!’ Ngambala komunye nomunye umbundu ophakamileko nangaphasi komunye nomunye umuthi ohlaza, walala lapho njengengwadla.

²¹ Mina ngakutjala usidiribe sekhethelo, uphelele usitjalo esithembekako. Alo, uphenduke njani-ke phambi kwami waba sidiribe sommango esinesivunda na?

²² Nanyana ungahlamba ngesoda, usebenzise isibha esinengi, ibala lecala lakho lihlala liphambi kwami.” Kutjho uSomnini uSomandla.

²³ “Ungatjho njani uthi, ‘Awa, mina angikasilaphali! Akhange ngidlhemadlheme ngemva kwaboBhali’? Qala bona bewuziphethe njani emrhobeni, cabangisisa ngokwenzileko. Ufana nekamela esikazi eyehla yenyuka;

²⁴ iphundlukela erhalawumbeni ifamula iimpumulo inukelele ummoya. Ngubani ongayivimba nasele ibilelwa ziingazi na? Zoke eziduna eziyifunako azidingi ukuzikhathaza: Ngesikhathi sayo sokuzekwa ziyifunyana ngobuduze.

²⁵ Mina ngathi, ‘Ungagijimi bewudatjukelwe manyathelo, nomphimbakho bewome.’ Kodwana wena wathi, ‘Akusizi ngalitho! Awa, mina ngizithandela abatjhili nje-ke kumele sengidlhemadlheme ngemva kwabo.’

²⁶ “Njengesela elineenhloni nalibanjiweko, injalo nekumba ka-Israyeli yaba neenhloni, yona, amakhosayo neenkhulu zayo, abaphristi kanye nabaphorofidi bayo.

²⁷ Bathi esigodweni, ‘Wena ungubabami’, elitjeni bathi, ‘Wena wangibeletha’. Bangifulathele, bangifihlela ubuso babo. Kodwana ngesikhathi sesizi labo bathi, ‘Yewize usisindise!’

²⁸ Baphi-ke abozinyana owazenzela bona wena Juda? Abeze phela nakube bangakusindisa ngesikhathi sesizi lakho! Angithi wena unabozinyana abanengi njengamadorobhakho, Juda.

²⁹ “Kubayini ningisola? Noke nina ningihlubukile.” Kutjho uSomnini.

³⁰ “Ngimadlhe phasi abantwabenu ngelize, azange bamukele ukusolwa. Isabulenu irhiribidele abaphorofidi benu njengebhubezi elidabudabulako.”

³¹ Isizukulwaneso ngini! Nje-ke, yelelani ilizwi lakaSomnini nalithi: “Ngibe lirhalawumba ku-Israyeli, namkha inarha enobumnyama obukhulu na? Ngitjho ngombana abantu bami bathi, ‘Awa, kwanjesi sesifikile asizukubuyela kuwe erhalawumbeni.’

³² Intombi vane kheyikhohlwe ubuphaziphazi bayo nomlobokazi ivunulwakhe yomtjhado na? Kodwana napa abantu bami bangikhohliwe, bekwaba malanga angabalekiko.

³³ “Maye, unekghono lokufuna ithando! Ngitjho neengwadla zingafunda kuwe!

³⁴ Ezambathweni zakho kufunyanwa iingazi zabamsulwa, abadududu. Azange ubabambe bagqekeza, kodwana phezu kwakho koke lokhu ube nesandla.

³⁵ Nokho uthi, ‘Awa, mina anginamlandu, itukuthelo kaZimu ikude nami.’ Qala-ke, ngizakugweba ngombana uthi, ‘Mina anginasono.’ ”

³⁶ Kubayini ugwilike lula na? Uzakudaniswa yiGibhide njengombana udaniswe yi-Asiriya.

³⁷ Godu ukusuka lapho uzakuphuma uthwele imikhono ehloko ngombana uSomnini ubalahlile labo othembele kibo; angeze waphumelela.