UJOROMIYA 18 - IsiNdebele 2012 Translation

Ekumbeni yombumbi

¹ Nanti ilizwi elafika kuJoromiya livela kuSomnini:

² “Sikima, wehlele ekumbeni yombumbi, ngizafese ngikunikele umlayezwami.”

³ Nje-ke ngehlela ekumbeni yombumbi, ngamfumana asebenza ebubumbelweni.

⁴ Kodwana lokho agade akubumba ngomdaka konakalela ezandleni zakhe, nje-ke wabuya wabumba okhunye njengombana bekukuhle kuye ukukwenza lokho.

⁵ Yeke ilizwi lakaSomnini lafika kimi lathi:

⁶ “Wena kumba ka-Israyeli, angeze ngenza kini njengombana kwenza umbumbi lo na?” Godu uSomnini wathi: “Njengomdaka esandleni sombumbi, ninjalo-ke nani esandleni sami, nina kumba ka-Israyeli.

⁷ Ngesinye isikhathi ngingamemezela ngesizwe namkha umbuso kobana usitjhulwe, uwiswe bewutjhabalaliswe.

⁸ Kodwana nakube isizwe engimemezele ngaso siyaphenduka ebukhohlakalini baso, khona-ke ngizazisola ngobumbi ebengibuhlosile.

⁹ Ngesinye isikhathi ngingamemezela ngesizwe namkha umbuso kobana wakhiwe bewuhlonywe.

¹⁰ Kodwana nakube isizweso senza ubumbi phambi kwami bese singalaleli ilizwi lami, khona-ke ngizazisola ngobuhle ebengithe ngizasenzela bona.

¹¹ “Nje-ke, wena Joromiya, tjela abantu bakwaJuda nabahlali beJerusalema bonyana uSomnini uthi, ‘Qalani, sele ngizonidalela ihlekelele, iye, ngineqhinga ngani. Ngalokho phendukani eendleleni zenu ezimbi, omunye nomunye wenu, nilungise iindlela zenu kanye nezenzo zenu.’

¹² Kodwana abantwabo bazakuphudlha bathi, ‘Akusizi litho! Sizakukhamba ngamahlelwethu, omunye nomunye wethu uzakulandela lokho wena okubiza bona bulikhuni behliziywakhe ekhohlakeleko.’ ”

¹³ Ngalokho-ke nakhu okutjhiwo nguSomnini: “Buzani hlangana nezizwe: Ngubani owakhe wezwa okufana nalokhu na? Kunento erara khulu eyenziwe litlawu u-Israyeli.

¹⁴ Ingabe iliqhwa leLibhanoni liyasuka erharheni loSabekako namkha amanzi amakhaza nagelezako womthala weenkwekwezi zezulu atjhe na?

¹⁵ Kodwana nakubabantu bami bona, bangikhohliwe, batjhisela izinto ezinganabubhadekelo itjhwalo, okuzizinto ezibenza bawe eendleleni zabo, iye, eendleleni zekadeni. Zibenza bakhambe ngeendlela eziqamulako, emizileni engakakhiwa.

¹⁶ Ngalokho inarhabo iba libhudu, into yokurarekelwa ngesikhathi soke. Boke abadlula lapho bazakukhuza ngayo, bathintithe iinhloko ngokutlhuwa.

¹⁷ Njengommoya wepumalanga, ngizabahlakaza phambi kwezitha zabo, ngizabakhombisa umhlanami, bangaboni ubuso bami ngelanga lehlekelele.”

UJoromiya wenzelwa isigungu

¹⁸ Somnini, abantu bathi: “Asenzeni amaqhinga ngoJoromiya lo ngombana ukufundisa kwabaphristi umthetho angeze kwalahleka nezeluleko zabahlakaniphileko angeze zaphela ngitjho neemphorofido zabaphorofidi. Yeke, asimthelekeleni ngamezwi, singalaleli litho alitjhoko.”

¹⁹ Yewungilalele Somnini, yizwa bona bathini abaphikisani bami!

²⁰ Okuhle kumele kubuyiselwe ngobumbi na? Kodwana bangembele umgodi wesifu. Khumbula bonyana ngajama phambi kwakho ngabakhulumela kuhle, kobana ususe itukuthelwakho kibo.

²¹ Yeke, nikelela abantwababo ngendlala, ubafuthele emandleni wesabula. Abafazi babo ababe ziinyumba, babe bahlolokazi ngombana amadodabo abulewe namasokana wakhona arhayilwe ngesabula epini.

²² Akuzwakale umkhosi eenkumbeni zabo lokha nawubanikelela msinyana ngemigulukudu ngombana bangembele umgodi kobana bangibambe, bangibekela nezifu eenyaweni zami.

²³ Kodwana wena Somnini, wazi woke amaqhingabo wokungibulala. Ungacoleli icala labo namkha usule izono zabo phambi kwakho. Abaketulwe phambi kwakho, usebenze ngabo ngesikhathi setukuthelwakho.