UJOROMIYA 17 - IsiNdebele 2012 Translation

UJuda uyakhalinyelwa godu

¹ “Isono sakwaJuda sitlolwe ngesikhonkhwani sesimbi, iye, sagobhodlhwa ngetlobo yedayimani, emiqebethwini yeenhliziyo zabo neempondweni zama-aldarabo.

^2-3 Bahlubayela ngama-aldarabo nemifanekiso yabo-Atjhera emagegana nemithi ehlaza nemibundwini ephakamileko neentabeni emmangweni njengombana bahlubayela ngabantwababo. Juda, umnothwakho namagugwakho woke ngizakunikela ngawo njengepango, ngebanga leendunduma zakho ezisisono sakho kiyo yoke imikhawulwakho.

⁴ Kumele uhlukane nelifa lakho engakupha lona begodu uzakusebenzela izitha zakho enarheni ongayaziko ngombana uvuse itukuthelwami ezakuvutha mlibe.”

⁵ Nakhu okutjhiwo nguSomnini: “Akanikelelwe umuntu othembela ebantwini, owenza inyama ibe mamandlakhe nohliziywakhe ifulathela uSomnini.

⁶ Uzakuba njengomtjhana ebhudwini, angayiboni ipumelelo nayizako. Uzakuhlala hlangana nomankwana erhalawumbeni, iye, enarheni yetswayi lapha kungahlali muntu khona.

⁷ “Kodwana ubusisiwe umuntu othembela kuSomnini, othemba lakhe likuye.

⁸ Uzakufana nomuthi otjalwe eduze kwamanzi onabisela imirabhawo magegana nomlambo. Awesabi nakufika umtjhiso, amakarawo ahlala ahlaza. Awukhathazeki ngesikhathi sesomiso begodu awubhalelwa kuthela iinthelo.

⁹ “Ihliziyo imkhohlisi ngaphezu kwakho koke begodu yonakele khulu. Ngubani ongayilemuka na?

¹⁰ “Mina Somnini ngihlolisisa ihliziyo ngizizinye iziso, kobana ngivuze umuntu ngokweendlela zakhe, iye, ukuya ngokwemisebenzakhe.”

¹¹ Njengekwali eqoqosela amaqanda engakawabekeli, unjalo nomuntu ozuza umnotho ngendlela engakafaneli. Nasele amalangakhe ayile, uzamtjhiya umnotho lowo, bese ekugcineni uzakubonakala bonyana usidlhadlha.

¹² Isihlalo sobukhosi sephazimulo esaphakanyiswa kusukela ekuthomeni, siyindawo ecwengileko kithi.

¹³ Wena Somnini, themba laka-Israyeli, boke abakudelako bazakurhubutjhwa. Amabizo wabamnyefulako azakutlolwa endaweni yabafileko ngombana badele uSomnini, omthombo wamanzi wokuphila.

¹⁴ Yewungipholise Somnini, ngizakuphola; ngisindise, ngizakusinda ngombana wena uyindumiswami.

¹⁵ Bahlalele ukuthi kimi: “Liphi ilizwi lakaSomnini na? Alizaliseke-ke kwanjesi!”

¹⁶ Mina azange ngikuhlohloloze bona uthumele ihlekelele begodu azange ngifise ilanga lokubhujiswa. Okwaphuma emlonyenami uyakwazi, ngakutjho phambi kwakho.

¹⁷ Ungabi kukwesabeka kimi, wena usiphephelo sami ngelanga lehlekelele.

¹⁸ Abazumana nami abahlaziseke kodwana mina ngingabi sehlazweni; bona ababe nevalo, kodwana mina ungenze ngingesabi. Behlisele ilanga lehlekelele, ubarhayile ngokubuyelelweko.

Ukugcina iSabatha licwengile

¹⁹ Nakhu okwatjhiwo nguSomnini kimi: “Khamba uyokujama esangweni iButho, lapha kungena bekuphume khona amakhosi wakwaJuda. Godu jama kiwo woke amanye amasango weJerusalema,

²⁰ bese uthi, ‘Lalelani ilizwi lakaSomnini nina makhosi wakwaJuda, nani noke bantu bakwaJuda kanye nani noke bahlali beJerusalema, iye, nina eningena ngamasango la.

²¹ Nakhu okutjhiwo nguSomnini: Yelelani bona ningathwali umthwalo ngelanga leSabatha begodu ningangeni nawo emasangweni weJerusalema.

²² Godu ningathwali imithwalo niphume nayo ngeenkumbeni zenu ngelanga leSabatha. Ningasebenzi, kodwana gcinani iSabatha licwengile njengombana ngayala aboyihlo.

²³ Aboyihlo azange balalele namkha bavule iindlebe zabo; iye, baqinisa iintamo zabo ukuze bangezwa bebamukele ifundiso.

²⁴ Kodwana uSomnini wathi: Nina naningilalela kuhle bese aningeni nemithwalo emasangweni wedorobheli ngelanga leSabatha, nigcine iSabatha licwengile ngokungenzi imisebenzi mhlokho,

²⁵ khona-ke amakhosi namakhosana ahlala esihlalweni sobukhosi sakaDavida azakungena ngamasango wedorobheli. Azakungena akhwele iinkarana neenjomani, aphekelelwa madoda wakwaJuda nalawo ahlala eJerusalema begodu idorobheli lizakuhlalwa kuya kuyile.

²⁶ Abantu bazakuvela ngemadorobheni wakwaJuda neendaweni ezimagegana neJerusalema, emikhawulweni yakwaBhenjamini, emibundwini yeTjhefela, enarheni yeentaba nangesewula, balethe imihlabelo yokutjhiswa neyetjhebiswano, iminikelo yeenthoro neyetjhwalo ngokudumisa ekumbeni kaSomnini.

²⁷ Kodwana nakube aningilaleli ngokungagcini iSabatha licwengile, nithwale imithwalo naningena ngamasango weJerusalema ngelanga leSabatha, khona-ke ngizavuthisa umlilo ongasoze wacinywa emasangweni weJerusalema, uqothule imibhotjhongo yakhona.’ ”