UJOROMIYA 16 - IsiNdebele 2012 Translation

Amalanga wokubuyiselela afikile

¹ Ilizwi lakaSomnini lafika kimi lathi:

² “Ungathathi umfazi endaweni le bewube namadodana namadodakazi naye

³ ngombana nakhu okutjhiwo nguSomnini ngamadodana namadodakazi abelethelwe endaweni le nangabafazi namadoda ababelethi bawo enarheni le,

⁴ ‘Bazakufa kabuhlungu. Angeze balilelwa begodu abazokungcwatjwa, kodwana bazakufana nomsuqwa emasimini. Bazakurhayilwa ngesabula nangendlala, iindumbu zabo zibe kukudla kweenyoni zomkayi neembandana zommango.’ ”

⁵ Ngambala, nakhu okutjhiwo nguSomnini: “Ungangeni ngekumbeni yombuthano, ungayi ukuyokulila namkha uyokuzwelana nabo ngombana ngisusile ukuthula nokwethembeka kwami kanye nesirhawu sami ebantwinaba.” Kutjho uSomnini.

⁶ “Abakhulu nabancani bazakufa enarheni le. Abazukungcwatjwa nabantu abazukubalilela. Akunamuntu ozazirhaya namkha agude ehloko ngebanga labo.

⁷ Akunamuntu ozakuhlephula isikwa abelane nozilileko kobana amtjhiriye ngohlongakeleko. Akunamuntu ozababela ikapho yokududuza ngitjho nanyana kungaba ngubaba namkha umma ohlongakeleko.

⁸ “Ungangeni ekumbeni lapha kunomnyanya khona bese uhlala phasi kobana ugome bewusele.

⁹ Ngambala nakhu okutjhiwo nguSomnini, uMninimandlawoke, uZimu wakwa-Israyeli, ‘Emihlenenu, iye phambi kwenu, ngizakuphelisa amatjhada wethabo nokujabula kanye namaphimbo wabakhwenyana newabomalukazana endaweni le.’

¹⁰ “Nawutjela abantwaba koke lokhu bazakubuza bathi, ‘Kubayini uSomnini ahlele ihlekelele engaka phezu kwethu na? Soneni kangaka na? Sisonobani esisenzileko kuSomnini uZimethu na?’

¹¹ Uzakuthi kibo, ‘USomnini wathi: Kungombana aboyihlo bangidela, badlhemadlhema ngemva kwabosingazimu, babalotjha bebabakhothamela. Iye, bangidela, azange balonde umthethwami.

¹² Kodwana nakungini-ke khona nithuwelele kunaboyihlo. Qalani, omunye nomunye wenu ukhamba ngokukhunyalala kwehliziyo embi ngaphandle kokungilalela.

¹³ Nje-ke ngizaniqotjha enarheni le, niye enarheni eningayaziko ngitjho naboyihlo abangazange khebayibone. Lapho-ke nizakulotjha abosingazimu ubusuku nemini ngombana angeze ngaba nomusa phezu kwenu.’ ”

¹⁴ Godu uSomnini wathi: “Nokho isikhathi siyeza lapha abantu bangasoze basathi, ‘Ngifunga uSomnini owakhupha ama-Israyeli eGibhide’,

¹⁵ kodwana bazakuthi, ‘Ngifunga uSomnini owakhupha ama-Israyeli enarheni yangetlhagwini nakizo zoke iinarha lapha gade abaqotjhele kizo.’ Ngambala ngizababuyisela endaweni engayipha aboyise.

¹⁶ “Kodwana sele ngizokubiza abathiyi beenhlambi abanengi, bona-ke bazababamba. Ngemva kwalapho ngibize abazumi abanengi, bababuthe eentabeni nemibundwini kanye nemipharwini yamadwala.” Kutjho uSomnini.

¹⁷ “Amehlwami ahlezi kizo zoke iindlela zabo, azikasitheki kimi namacalabo akakafihleki emehlwenami.

¹⁸ Ngizababuyiselela ngokubuyelelweko mayelana namacala nesono sabo ngombana basilaphaze inarhami ngeenyenyiso zabo ezifileko begodu bazalise ilifa lami ngeenkghabhudlho zabo.”

¹⁹ Somnini, mandlami nesiphephelo sami, iye, ubuphephelo bami ngeenkhathi zesizi, kuwe izizwe zizakuza zivela epelazwe zithi: “Abobaba azange basitjhiyele litho ngaphandle kwabosingazimu abayikohliso, iye, akakho phakathi kwabo onobubhadekelo.”

²⁰ Abantu bangazenzela njani iinthombe bebazilotjhe khisibe azisuye uZimu na?

²¹ USomnini wathi: “Kwanjesi khona ngizabafundisa, iye, ngizabafundisa amandlami nesiphanga sami. Yeke bazakwazi bonyana ibizo lami nguSomnini.”