UJOROMIYA 15 - IsiNdebele 2012 Translation

¹ Yeke uSomnini wathi kimi: “Ngitjho nanyana uMosi noSamyela bebangajama phambi kwami, ummoyami awukho ebantwinaba. Basuse phambi kwamapha! Abakhambe!

² Nabakubuza bathi ‘Alo, sizakuyaphi nje?’ yithi kibo, ‘Nakhu okutjhiwo nguSomnini: “ ‘Bokufa, abaye ekufeni; besabula, esabuleni; bendlala, endlaleni; nebokuthunjwa, basiwe ekuthunjweni.’ ”

³ USomnini uthi: “Ngizababekela iimiso ezine zeenrhayili: “isabula kobana ibulale, izinja kobana zirhudule, iinyoni zomkayi kobana zirhiribidele neembandana zommango kobana zibatjhabalalise.

⁴ “Ngizabenza babe sisethuso kiyo yoke imibuso yephasi ngebanga lalokho okwenziwa nguManase umsa kaHezekhiya ikosi yakwaJuda eJerusalema.

⁵ “Ngubani ozakurhawukela wena Jerusalema; ngubani ozakutlhuwela na? Ngubani ozakuphambukela akubuze amavuko na?

⁶ Nakunguwe ungilahlile; usuhlala uhlubuka mihla le. Ngalokho ngelule isandla sami ngokujamelana nawe. Sengidiniwe kwanjesi ukuzwelana nawe.” Kutjho uSomnini.

⁷ “Ngeforogo yokwengula ngibengulile emasangweni wamadorobho wenarha; ngibenze bangabi nabantwana, ngabhubhisa abantu bami ngombana azange batjhugulule iindlela zabo.

⁸ Abahlolokazi babo bandile kimi ukudlula itjhwabatjhwaba yelwandle. Phezu kwabahlolokazabo, iye, phezu kwabonina lamasokana ngizakwehlisela umbhubhisi emini ekulu. Ngesikhatjhana ngizabehlisela ukukhungatheka nokwesaba.

⁹ Umfazi obelethe abantwana abalikhomba uzakuphela amandla, akhefuzele. Ilanga lakhe lizakutjhinga emini, arhubutjhwe abe ehliswe isithunzi. Abasindileko ngizabanikela esabuleni yezitha zabo.” Kutjho uSomnini.

UJoromiya unghonghoyila ngobujamo akibo

¹⁰ Maye kimi, mma, ngokungibeletha! Mbala, ngimumuntu obanga ipikiswano nokucabana inarha yoke! Angizange ngibolekise namkha ngiboleke ebantwini, khonapho boke abantu bayangisongela.

¹¹ USomnini wathi: “Ngambala, ngakukhunyalalisa ngehloso ehle, iye, ngakuncengela ezitheni zakho ngesikhathi sehlupheko nangesikhathi sesizi.

¹² Umuntu angayiphahlaza isimbi, iye, isimbi ebuya ngetlhagwini namkha ikoporo na?

¹³ KuJuda ngathi, ‘Umnothwakho namagugwakho ngizakunikela ngawo njengepango simahla, ngebanga lezono zakho zoke kiyo yoke imikhawulwakho.

¹⁴ Ngizakunikela ezitheni zakho enarheni ongayaziko ngombana ngiyavutha ngelaka elitjhisa phezu kwenu.’

¹⁵ Lokho uyakwazi wena Joromiya!” Somnini, yewungikhumbule, ungitjheje! Ngibuyiselela kabangizumako. Ungangisusi ngebanga lokubabekezelela kwakho. Yazi bonyana ngithwele ihlamba ngenca yakho.

¹⁶ Ngagoma amezwakho njengeliju; iye, ukutholakala kwamezwakho kwaba kukwethaba kimi nokwenama kwehliziywami, ngombana ngibizwa ngawe iye, ngebizo elithi Somnini, Zimu onguMninimandlawoke.

¹⁷ Azange ngihlale hlangana nabarhubutjhekileko, azange ngizijabulise nabo. Bengizihlalela ngedwa ngebanga lesandla sakho ngombana bewungihlohle ngamezwi wokunikelela.

¹⁸ Kubayini ubuhlungu bami bungapheli nenceba lami lingapholi na? Liridilile, alisapholi. Ingabe ngambala uzakuba kimi njengomlanjana okhohlisako ube njengamanzi atjhako na?

¹⁹ Nje-ke, nakhu okutjhiwo nguSomnini: “Nakube ubuyela kimi bese ngiyakuvumela bonyana ubuye, khona-ke uzakubuya ube yincekwami godu. Nakube emlonyenakho kuphuma okuvuthiweko, okungasibo ubudlhadlha, khona-ke uzakuba ngusomlomami. Abantwaba ababuyele kuwe, kodwana wena ungabuyeli kibo.

²⁰ Nje-ke ebantwinaba ngizakwenza ube mthangala wekoporo ongafikelelekiko: Bazakulwa nawe kodwana angeze bakuhlule ngombana nginawe kobana ngikusindise, ngikwenyele.” Kutjho uSomnini.

²¹ “Iye, ngizakwenyela ezandleni zeenkhohlakali, ngikuhlenge entendeni yesandla sabanelunya.”