UJOROMIYA 14 - IsiNdebele 2012 Translation

Isomiso esikhulu

¹ Nanti ilizwi lakaSomnini elafika kuJoromiya malungana nesomiso esikhulu:

² UJuda uyabibitheka, amadorobhakhe ayawohloka; abantu bambethe iinzilo, bahlezi phasi, isililo seJerusalema siyakhuphuka.

³ Iinkhulu zithuma iinsebenzi zazo amanzi, ziya emithonjeni kodwana zifunyane yomile. Zibuya nemigqomazo idududu, zikhene bezidane, zigubuzese iinhloko.

⁴ Umkhiqizo wequlwani utjhabalalisiwe ngombana akunazulu enarheni. Abalimi bakhenile nabo bagubuzese iinhloko zabo.

⁵ Ngitjho nehlangukazimataka emmangweni, ihlamuka imbuzanayo esanda ukuzalwa ngombana akunatjani.

⁶ Abodumbana bommango bajame emizileni yemilandelande, barhogela ummoya njengeempungutjha, amehlwabo afiphele ngombana akunamadlelo.

⁷ Nanyana amacalethu ajamelene nathi, Somnini, phuma neqhinga ngebanga lebizo lakho, iye, nanyana ukuhlubuka kwethu kukunengi. Ngambala, sikonele!

⁸ Maye, wena themba laka-Israyeli; msindisakhe ngeenkhathi zesizi, kubayini ufana nephandle enarheni, njengesikhambi esiphambukele ubusuku bunye na?

⁹ Kubayini ufana nomuntu okakameleko, iye, njengengorho enganamandla wokusindisa na? Uphakathi kwethu wena Somnini begodu sibizwa ngawe, ungasilahli!

¹⁰ Nakhu okutjhiwo nguSomnini ngabantu bakhe: “Iye, ngiphakathi kwabo, kodwana bakuthanda khulu ukunyariya, ababambi iinyawo zabo.” Ngalokho uSomnini akabamukeli; yeke uzakukhumbula ubukhohlakali babo abahlunguphazele izono zabo.

Abaphorofidi bamanga

¹¹ Nje-ke uSomnini wathi kimi: “Ungathandazeli abantwaba ubabawele okuhle.

¹² Nanyana bazila ukudla, angizukulalela isililo sabo, nanyana bangenza imihlabelo yokutjhiswa neminikelo yeenthoro, angizubamukela, kodwana ngizobaqeda ngesabula, ngendlala nangezifo.”

¹³ Nje-ke ngathi: “Awu, Somnini, Somandla, qala abaphorofidi babatjela bathi, ‘Anizukubona isabula nendlala ayizukunithinta, kodwana mina, Somnini ngizanipha ukuthula kwamambala endaweni le.’ ”

¹⁴ Nje-ke uSomnini wathi kimi: “Abaphorofidi baphorofida amanga ngebizo lami. Angikabathumi, angikabayali begodu azange bengikhulume nabo. Baphorofida kini amanga ngemibono, ngokubhula okungekho nangekohliso yemikhumbulwabo.

¹⁵ Ngalokho nakhu okutjhiwo ngimi uSomnini ngabaphorofidi abaphorofida ebizweni lami ngingakabathumi kodwana baphorofida bonyana akuzukuba nesabula namkha indlala: Abaphorofidabo bazakuqedwa ngesabula nangendlala.

¹⁶ Abantu abaphorofida kibabo bona bazakulahlelwa eendledlaneni zeJerusalema ngebanga lendlala nesabula. Akunamuntu ozababulunga, bona nabafazi babo, amadodana namadodakazabo. Ngizokurhutjhulela ubukhohlakali babo phezu kwabo.

¹⁷ Batjele amezwi lawo.” Amehlwami akatshege iinyembezi, ubusuku nemini zingomi ngombana itlawu elibabantu bami lineduma elesabekako, iye, inceba elingalaphekiko.

¹⁸ Nangiya emmangweni qala, napo abarhayilwe yisabula, nangingena ngedorobheni, qala, napo abaguliswa yindlala! Abaphorofidi ngitjho nabaphristi baye enarheni abangayaziko.

¹⁹ Somnini, ulahle uJuda ngokupheleleko na? Unyaza iZiyoni na? Usihlunguphazeleni kobanyana singasaphola na? Besirhuluphele ukuthula nesikhathi sokupholiswa kodwana akunabuhle obusehleleko, kwaba ziinkathazo kwaphela.

²⁰ Somnini, siyabuvuma ubukhohlakali bethu kanye necala labobaba: Ngambala, sonile kuwe.

²¹ Ngebanga lebizo lakho, ungasilahli, ungadeli isihlalo sakho sobukhosi esidumileko. Khumbula isivumelwano sakho nathi ungasephuli.

²² Hlangana nabosingazimu bezizwe ukhona onganisa izulu na? Umkayi ngokwawo ungehlisa izulu na? Awa, nguwe kwaphela Somnini, Zimethu ongakwenza lokho. Yeke ithemba lethu likuwe kwaphela ngombana nguwe wedwa owenza koke lokhu.