UJOROMIYA 13 - IsiNdebele 2012 Translation

Ukubhujiswa kwakaJuda

¹ Nakhu okwatjhiwo nguSomnini kimi: “Khamba ufese uthenge umkhungo wokuthekeleza welineni uwubophe edinini lakho, ungawenyi.”

² Yeke ngawuthenga umkhungo lowo njengombana bekuyale uSomnini, ngawubopha edinini lami.

³ Ilizwi lakaSomnini leza kimi kwesibili, lathi:

⁴ “Thatha umkhungo owuthengileko lowo owubophe edinini bese uya emlanjaneni wePerathi ufese uwufihle lapho empharwini wamadwala.”

⁵ Yeke ngakhamba ngayowufihla ePerathi njengombana uSomnini angiyalile.

⁶ Ngemva kwamalanga amanengi uSomnini wathi kimi: “Khamba khona nje uye ePerathi uyokuthatha umkhungo, lapha ngakuyala bona uwufihle khona.”

⁷ Nje-ke ngaya ePerathi ngafese ngarhubha umkhungo, ngawukhupha lapha bengiwufihle khona. Qala besele uvithikile ungasenamsebenzi.

⁸ Yeke ilizwi lakaSomnini lafika kimi,

⁹ lathi: “Nakhu okutjhiwo nguSomnini, ‘Ngaleyondlela ngizakutjhabalalisa ubuphaziphazi bakwaJuda, ngitjho nobuphaziphazi obukhulu beJerusalema.

¹⁰ Abantu abakhohlakelekwaba, ababhala ukulalela amezwami, balandela ukukhunyalala kweenhliziyo zabo bese badlhemadlhema ngemva kwabosingazimu kobana babalotjhe bebabakhothamele, bazakufana nomkhungo lo, iye bangabi namsebenzi!

¹¹ Njengombana umkhungo wokuthekeleza ubotjhwa edinini lomuntu, ngokunjalo ngabopha yoke ikumba yakwa-Israyeli neyakwaJuda kimi, kobana babe babantu bami, idumo lami, ukulongwa kanye nephazimulo yami. Kodwana azange balalele.’ ” Kutjho uSomnini.

Imijeka yewayini

¹² “Khuluma nabo ubatjele bona nakhu okutjhiwo nguSomnini uZimu wakwa-Israyeli, ‘Yoke imijeka kumele izaliswe ngewayini.’ Nje-ke bazakuthi, ‘Kghani asazi bonyana yoke imijeka kumele izaliswe ngewayini na?’

¹³ Wena batjele bonyana uSomnini uthi, ‘Qalani, sele ngizobazalisa ngobudakwa boke abahlala enarheni le, ngitjho namakhosi ahlezi esihlalweni sobukhosi bakaDavida, abaphristi, abaphorofidi kanye nabo boke abahlali beJerusalema.

¹⁴ Ngizabaphahlaza omunye phezu komunye, aboyise nabantwana ngokufanako. Angeze ngabancenekela, ngibaqale ngesisa namkha ngibarhawukele kobana ngingabatjhabalalisi.’ ”Kutjho uSomnini.

Ukuthunjwa kuyeza

¹⁵ Yizwani nilalelisise, ningacanasi ngombana uSomnini ukhulumile.

¹⁶ Nikelani uSomnini uZimenu idumo ngaphambi kobana alethe ubumnyama, iye, ngaphambi kobana nizithareje emibundwini ebumnyameni. Nizakulinda umkhanyo, kodwana uzawenza ube lithunzi elesabekako iye, ubumnyama obumabhombo.

¹⁷ Kodwana naningalaleliko, umphefumulwami uzokulilela ngemsitheleni ngebanga lokuziphakamisa kwenu, amehlwami azakurhahlawula, awuluke iinyembezi, ngombana umhlambi kaSomnini uzabe uthunjiwe.

¹⁸ Yithi ekosini nakunina lekosi: “Hlalani phasiphasi ngombana iinhlohlo zenu zephazimulo zethuliwe eenhloko zenu.

¹⁹ Amadorobho wangesewula anikelwe esitheni, akakho ongawahlenga. Woke uJuda usiwe ekuthunjweni, iye, uthunjwe ngokupheleleko.”

²⁰ USomnini uthi: “Wena Jerusalema, phakamisa amehlwakho ubone labo abavela ngetlhagwini. Uphi umhlambi owaphiwa wona, iye, umhlambakho omuhle na?

²¹ Uzakuthini isitha nasibeka phezu kwakho abakhozi bakho kobana babe makhosana iye, abantu wena ngokwakho obafundisileko na? Awuzukuphathwa ziinhlabi njengomfazi obelethako na?

²² Ngambala uzazibuza uthi, ‘Kubayini ngehlelwe ngilokhu na?’ Kungebanga lezonokazi zakho kobana ugutjululwe iinthimba, uhlukunyezwe iinkhondo.

²³ UmKutjhe angazitjhugulula umbala nengwe amabala na? Nakunjalo, nani ningakghona ukwenza okuhle, nina enithuweleleko ekwenzeni okumbi.

²⁴ “Ngizanihlakaza njengamawunguwungu aphetjhulwa mumoya werhalawumba.

²⁵ Lokhu yifumbe yakho, Jerusalema, isabelo engikulinganisele sona ngombana ungikhohliwe wathembela kibozinyana bamanga.” Kutjho uSomnini.

²⁶ “Ngimi okugubulule iinthimba zakho ukuze ububhunubhunu bakho bube semtarini:

²⁷ iinkanuko zakho zokuhlobonga nokurhuwelela kwakho njengengwadla, iye, ubungwadla bakho obulihlazo phezu kwemibundu yemmangweni. Ngibone izenzo zakho ezinyenyisako! Uzazizwa wena Jerusalema! Kuzabe kube nini ulokhu usilaphele na?”