UJOROMIYA 11 - IsiNdebele 2012 Translation

Isivumelwano sephuliwe

¹ Nanti ilizwi elafika kuJoromiya libuya kuSomnini:

² “Lalelani amezwi wesivumelwanesi. Wena Joromiya, khuluma nabantu bakwaJuda nabahlali beJerusalema

³ ubatjele bonyana nakhu okutjhiwo nguSomnini, uZimu wakwa-Israyeli, ‘Akanikelelwe umuntu ongalaleli amezwi wesivumelwanesi,

⁴ iye, amezwi engayala ngawo aboyihlo lokha nangibakhupha eGibhide, ekehleni yomlilo wesimbi. Ngabayala ngamezwi la: Lalelani amezwami beniwalandele ngokuya ngakho koke enginiyala ngakho ukuze nibe babantu bami, mina ngibe nguZimenu.’

⁵ Ngenza lokhu ukuze ngizalise isifungo engasifunga kiboyihlo sokubanikela inarha egeleza ibisi neliju njengombana kunjalo namhlanje.” Ngaphendula ngathi: “Amen, Somnini!”

⁶ USomnini wangiyala bonyana ngimemezele woke amezwi la emadorobheni wakwaJuda neendledlaneni zeJerusalema ngithi: “Lalelani amezwi wesivumelwanesi beniwalandele.

⁷ Mbala, ngabayelelisa bengabayelelisa aboyihlomkhulu lokha nangibakhupha eGibhide, iye, ngabayelelisa imini yoke ngathi, ‘Lalelani amezwami!’ Ngabayelelisa bekube namhlanjesi,

⁸ kodwana azange bangilalele bebangitjheje. Iye, omunye nomunye walandela ubulikhuni behliziyokazakhe ekhohlakeleko. Yeke, ngabehlisela woke amanikelela wesivumelwano ebengibayale ngaso kobana basilandele kodwana bangasigcina.”

⁹ Godu uSomnini wathi kimi: “Kunobukhwebetjhana hlangana nabantu bakwaJuda nabahlali beJerusalema:

¹⁰ Baphendukele ezonweni zaboyise abala ukulalela amezwami. Badlhemadlhema ngemva kwabosingazimu kobana babalotjhe. Iye, ikumba yakwa-Israyeli neyakwaJuda zephule isivumelwano engasenza naboyise.

¹¹ Ngalokho nakhu okutjhiwo nguSomnini, ‘Qalani, sele ngizobehlisela ihlekelele abangeze baphunyurha kiyo. Nanyana bangalila kimi, angizobalalela.

¹² Amadorobho wakwaJuda nabahlali beJerusalema bazakhamba bayokulilela abosingazimu ababatjhisela itjhwalo, kodwana angeze babasize nakancani lokha ihlekelele nayibafikelako.

¹³ Nina bantu bakwaJuda ninabosingazimu abanengi njengamadorobhenu begodu nakhele usingazimu onyenyisako ama-aldari amanengi njengeendledlana zeJerusalema kobana nitjhisele uBhali loyo itjhwalo.’

¹⁴ “Ngalokho wena Joromiya, ungabathandazeli abantwaba, ungabalileli namkha ubakhulumele ngombana angeze bengilalele lokha nabangibiza ngebanga lehlekelelabo.

¹⁵ “Wenzani wena Juda, othandiweko wami ngekumbenami nawuluka amano akhohlakeleko na? Ubunengi benyama yomhlabelo bungagegedisa ihlekelele ukuze ngemva kwalokho uthabe ekukhohlakaleni kwakho na?

¹⁶ Mina Somnini khengakubiza bona umumuthi wama-oliva ohlaza noneenthelo ezihle neziqalekako. Kodwana ngomdumo wokuhlokoma kwesiqubuthu, ngizawuthungela ngomlilo amagatjawo atjhwabe.

¹⁷ “Iye, mina Somnini uMninimandlawoke okutjalileko ngikubekele ihlekelele ngebanga lobumbi bekumba yakwa-Israyeli neyakwaJuda ezizibizele yona, ngokungithukuthelisa lokha nazitjhisela uBhali itjhwalo.”

Ipilo kaJoromiya isengozini

¹⁸ USomnini nguye owangitjelako yeke ngazi ngalokho. Iye, Somnini kusukela ngesikhathesi wembula izenzo zabo kimi:

¹⁹ Benginjengemvana ekhuliswe ekhaya yathathwa yasiwa ekuhlatjweni. Azange bengitjheje bonyana bebenza ubukhwebetjhana ngami basithi: “Asonakaliseni umuthi nobuhlaza bawo; asiwugawuleni ukuze ungasaphila, ibizo lawo lingasakhunjulwa.”

²⁰ Kodwana wena Somnini, Mninimandlawoke, wena ogweba ngokulunga, ohlola ihliziyo neziso, yewungibonise ukuzibuyiselela kwakho phezu kwabo ngombana indabami ngiyinikele kuwe.

²¹ Nje-ke uSomnini wathi kimi: “Nakhu engikutjhoko mina Somnini, ngamadoda we-Anatothi azumana nepilwakho athi, ‘Ungaphorofidi ebizweni lakaSomnini, nakungasinjalo sizakubulala ngezandla zethwezi.’

²² Iye, nakhu engikutjhoko, ‘Ngizowahlunguphaza. Amasokana azakufa ngesabula, amadodana namadodakazawo abulawe yindlala.

²³ Akuzukusala ngitjho namunye ngombana ngizakwehlisela ihlekelele phezu kwamadoda we-Anatothi ngomnyaka wokuhlunguphazwa kwawo.’ ”