UJOROMIYA 1 - IsiNdebele 2012 Translation

Isingeniso

¹ Amezwi kaJoromiya umsa kaRhilikhiya, ongomunye wabaphristi be-Anatothi esifundeni sakwaBhenjamini.

² Ilizwi lakaSomnini lafika kuJoromiya emnyakeni wetjhumi nantathu wokubusa kwakaJosiya umsa ka-Amoni ikosi yakwaJuda

³ nangesikhathi sokubusa kwakaJehoyakhimu umsa kaJosiya ikosi yakwaJuda, bekube sekupheleni komnyaka wetjhumi nanye wokubusa kwakaTsedekhiya umsa kaJosiya ikosi yakwaJuda, lokha abantu beJerusalema nabaya ekuthunjweni ngenyanga yesihlanu.

Ukubizwa kwakaJoromiya

⁴ Ilizwi lakaSomnini lafika kimi lisithi:

⁵ “Ngaphambi kobana ngikubumbe ngesibelethweni, besele ngikukhethile, iye, ngaphambi kobana ubelethwe, ngakuhlukanisela, ngakubeka bona ube mphorofidi ezizweni.”

⁶ Mina ngathi: “Maye mina! Somnini Somandla, qala, angikabi ukwazi ukukhuluma tjhatjhalazi. Ngisesemsana.”

⁷ Kodwana uSomnini wathi kimi: “Ungeze wathi, ‘Ngisesemsana’, ngombana komunye nomunye engikuthuma kuye, kufanele uye begodu nanyana yini engikuyala ngayo, kufuze uyitjho.

⁸ Ungabesabi ngombana nginawe kobana ngikwenyele.” Kutjho uSomnini.

⁹ Khonapho uSomnini welula isandla sakhe, bona sikghwathe umlomami bewathi kimi: “Yizwa, ngibeke amezwami emlonyenakho.

¹⁰ Yelela, namhlanjesi ngikubeka phezu kwezizwe nemibuso kobana usiphule bewubhuruze, utjhabalalise bewugirize, wakhe bewutjale.”

¹¹ Ilizwi lakaSomnini lafika kimi lathi: “Joromiya, ubonani na?” Mina ngathi: “Ngibona igatja lomuthi we-alimondi.”

¹² USomnini wathi kimi: “Awa, ubone kuhle ngombana ngiyelele mayelana nelizwi lami kobana ngilenze.”

¹³ Ilizwi lakaSomnini leza kimi kwesibili lathi: “Ubonani-ke kwanjesi?” Ngathi: “Ngibona imbiza ekghaphakako, itjhigeme yafulathela itlhagu.”

¹⁴ USomnini wathi kimi: “Ihlekelele izakukghaphaka isuka ngetlhagwini ithulukele phezu kwabo boke abahlali benarha.

¹⁵ Mbala, sele ngizokubiza woke amakhosi wangetlhagwini ngokuhlukana kwawo.” Iye, watjho njalo uSomnini. “Azakuza bese abeka iinhlalo zawo zobukhosi ebungenweni bamasango weJerusalema, azakujamelana nayo yoke imithangalayo ezombelezileko kanye nayo yoke imizana yakwaJuda.

¹⁶ Ngizakukhupha isigwebo sami phezu kwabantu beJerusalema nebakwaJuda ngenca yokukhohlakala abakwenzileko ngokungilahla kwabo, batjhisela abosingazimu itjhwalo, bakhothamela okwenziwe zizandla zabo.

¹⁷ “Thekeleza! Sikima, ubatjele koke engikuyala ngakho. Ungabesabi, nakungasinjalo ngizakwenza ubesabe.

¹⁸ Namhlanjesi ngikwenze waba lidorobho elinemithangala, isika yesimbi kanye nemithangala yekoporo kobana ujamelane nenarha yoke. Iye, ujamelane namakhosi wakwaJuda, iinkhulu zakhona, abaphristi bakhona kanye nabantu benarha leyo.

¹⁹ Bazakulwa nawe kodwana angeze bakuhlule ngombana nginawe kobana ngikwenyele.” Kutjho uSomnini.