UJONA 4 - IsiNdebele 2012 Translation

UZimu ufundisa uJona isifundo

¹ UJona samsilinga khulu isenzwesi bewabibhelana.

² Wathandaza uSomnini wathi: “Maye Somnini, akhange ngisole ngisesesenarheni yekhethu na? Kungebangeli-ke mina fengathoma ngokubalekela eTharatjhitjhi. Ngazile bona unguZimu onomusa nesirhawu, ubuthaka ekusilingekeni. Ukwethembeka kwakho kukhulu. UnguZimu oriyadako ukurhayila.

³ Nje-ke Kosami, dumbana uthathe ipilwami; kungcono ngife kunobana ngiphile.”

⁴ Kodwana uSomnini wamphendula wathi: “Unelungelo lokubibhelana na?”

⁵ UJona waphuma ngedorobheni wayokuhlala ngepumalanga yalo, wazenzela umthunzi ngamatjhwaba lapho. Wahlala lapho wakha umkhanyo afuna ukubona bonyana kuzokwenzakalani ngedorobheli.

⁶ USomnini uZimu waveza umrarela; bewakhula wanaba wenzela uJona umthunzi ukuze asithe ihlokwakhe. UJona wawuthabela khulu umrarela lowo.

⁷ Kodwana kwathi ngomuso ngesamarimarima uSomnini waveza ipehli yadla umrarela lowo bewatjhwaba.

⁸ Kwathi nakuphuma ilanga uZimu waletha ummoya otjhisako ovela ngepumalanga, ilanga lanemba uJona ehloko bewatsirimizeka. Wakhanukela ukufa wathi: “Kungcono ngife kunobana ngiphile.”

⁹ Kodwana uZimu wathi kuJona: “Unelungelo lokubibhelana ngebanga lomrarela lo na?” UJona wathi: “Iye, nginelungelo lokubibhelana kangangoba kuthi angife.”

¹⁰ USomnini wathi kuye: “Wena utshwenyeke ngomrarela lo; nanyana ungazange uwujulukele. Umile ngobusuku bunye begodu watjhabalala ngobusuku bunye.

¹¹ Alo-ke mina bengingakameli bonyana ngitshwenyekele iNiniva idorobho elikhulu kangaka elinabantu abangaphezu kweenkulungwana ezilikhulu namatjhumi amabili abangazi bonyana emuva kukuphi naphambili kukuphi, nefuyo enengi kangaka na?”