UJONA 3 - IsiNdebele 2012 Translation

Ukutjhuguluka kwabantu beNiniva

¹ Ilizwi lakaSomnini lafika kuJona kwesibili lathi:

² “Khuphuka uye edorobheni elikhulu iNiniva ufese ubakhalime ngamezwi engikuthume wona.”

³ UJona wakhuphuka waya eNiniva njengokutjho kwelizwi lakaSomnini. INiniva begade kulidorobho elikhulu kwamambala, bekuthatha amalanga amathathu ukulizombeleza.

⁴ UJona kwamthatha ikhambo lelanga ukuqangula ngaphakathi kwedorobho. Wabika wathi: “Kusele amatjhumi amane wamalanga bonyana iNiniva irhayilwe.”

⁵ Amadoda weNiniva akholwa kuZimu. Abeka ilanga lokuzila ukudla kusukela komkhulu kuya komncani, embatha iinzilo.

⁶ Ikosi yeNiniva yathi ingezwa iindabezi, yasikima esihlalweni sayo, yahlubula iingubo zayo zobukhosi, yazibhibha ngomgodla yahlala phasi ebhudwini.

⁷ Yakhupha umbiko eNiniva yathi: “Umyalo ovela ekosini neenduneni zayo uthi: Kungabi nomuntu ogomako noselako, ifuyo ekulu nencani nayo ingadliswa begodu ingasezwa amanzi.

⁸ Abantu bazibhibhe ngemigodla kanye nefuywabo. Ababize uZimu ngamandla. Omunye nomunye atjhiye iindlela zakhe zobukhohlakali nenturhu esezandleni zakhe. Ngombana ngubani owaziko,

⁹ mhlamunye uZimu angazisola ebukhalini bakhe asirhawukele ukuze singabhubhi.”

¹⁰ UZimu wabona izenzo zabo, nangendlela baphenduke ngayo ebukhohlakalini babo, wabarhawukela azange asababhubhisa njengombana agade atjhwile.