UJONA 2 - IsiNdebele 2012 Translation

Umthandazo kaJona

¹ UJona wathandaza uSomnini uZimakhe angemathunjini wehlambi, wathi:

² “Emahlungwinami ngalilela uSomnini, yeke wangiphendula. Phakathi kokufa ngarhuwelela ngifuna isizo, yeke watjheja isililo sami.

³ Wangijikijela emajukujukwini, phakathi ekuzikeni kwamalwandle; umsele wangizombeleza, amagagasi angigubuzesa.

⁴ Ngathi, ‘Ngiqotjhiwe ebusweni bakho, kodwana ngaqalelela godu ithempela lakho elicwengileko.’

⁵ Amanzi apheze angikghama, ukuzika kwangizombeleza, ikhula lelwandle lararela ihlokwami.

⁶ Ngatjhinga phasi esidindini seentaba, iphasi langivalela ngaphakathi kwalo ingunaphakade. Kodwana wena Somnini Zimami, wakhuphula ipilwami emgodini.

⁷ Lokha ummoyami nawuphelelwa mamandla, ngakhumbula uSomnini. Umthandazwami wakhuphukela kuwe, wafikelela ethempelini lakho elicwengileko.

⁸ Labo abathembela kibosingazimu abanganabubhadekelo, baphunyurhwa ngoThembekileko kibo.

⁹ Kodwana mina ngizokuletha umhlatjelo kuwe, ngikubabaze ngesihlabelelo sokudumisa. Engikufungeleko ngizakuphumelelisa, isindiso ivela kuSomnini.”

¹⁰ USomnini walayela ihlambi bonyana ihlanzele uJona ehlabathini eyomileko.