UJONA 1 - IsiNdebele 2012 Translation

UJona ubalekela uSomnini

¹ Ilizwi lakaSomnini lafika kuJona indodana ka-Amitayi, lathi:

² “Khuphuka uye edorobheni elikhulu iNiniva, ufike ubakhalime ngombana ubukhohlakali babo sele benyuke bebafika phambi kwami.”

³ Kodwana uJona wabalekela uSomnini wanqomba eTharatjhitjhi. Wehlela eJopha lapha afunyana khona isithayamanzi siya eTharatjhitjhi. Selakhokhe imali yekhambo, wehlela ngaphakathi kwesithayamanzi wakhamba nabathayi eTharatjhitjhi abalekela uSomnini.

⁴ USomnini wavusa ummoya omkhulu elwandle, kwaba nesiwuruwuru esinamandla; isithayamanzi safuna ukuhliphilika.

⁵ Abathayi bethukwa bekwathi omunye nomunye wabiza uzimakhe. Bajikijela umthwalo ngelwandle ukwenzela bona isithayamanzi sibe lula. Kodwana uJona wehlela endaweni engaphasi yesithayamanzi walala ubuthongo.

⁶ Ukapteni wehlela kuye wathi: “Wena ulala ngendlela enjani na? Vuka ubize uzimakho! Mhlamunye uZimu angasicabangela singabhubhi.”

⁷ Abathayi bakhuluma bodwa bathi: “Asenzeni ifumbe ukuze sithole bona ngubani umuntu osibangele umhlolokazi ongaka lo.” Benza ifumbe; yadla uJona.

⁸ Bambuza-ke bathi: “Akhe usitjele, ngubani osibangele umhlolo ongaka na? Usebenza msebenzi bani wena na? Udabukaphi? Uvela kiyiphi inarha? Njekhona umhlobo bani?”

⁹ Wabaphendula wathi: “NgimHebheru begodu ngithobela uSomnini uZimu osezulwini, okunguye umenzi welwandle nenarha.”

¹⁰ Amadoda ethukwa khulu abuza athi: “Alo-ke, woneni na?” Abuza nje, begade selasazi bonyana umrhali lo ubalekela uSomnini ngombana ukhe wawadembela.

¹¹ Ilwandle larhagala ngokukhiphizela. Ambuza athi: “Alo-ke kufanele sikwenzeni ukuze ilwandle lirhobhe na?” Lokhu bakutjho ngombana ilwandle lalirhagele.

¹² Wabaphendula wathi: “Yeningithathe ningijikijele ngelwandle, yeke amagagasi eniphakathi kwawo azakurhobha. Ngiyazi bona ngimi engibangele ukurhagala okungaka kwelwandle.”

¹³ Amadoda la enza koke okusemandlenawo ukubuyela enarheni. Kodwana ahluleka ngombana ilwandle lawarhagalela khulu kunekuthomeni.

¹⁴ Athoma alilela uSomnini athi: “Siyakubawa Somnini, asingafi ngebanga lendoda le. Ungasivumeli ukubulala indoda le ngaphandle komlandu ngombana wena Somnini wenza njengombana uthanda.”

¹⁵ Ambamba-ke uJona amjikijela ngelwandle; kwathi ilwandle ebegade lirhagele larhobha.

¹⁶ Amadoda ethukwa khulu esaba uSomnini, enzela uSomnini umhlabelo neemfungo.

¹⁷ USomnini waletha ihlambi ekulu eyafika yaginya uJona. UJona wahlala ngemathunjini wehlambi leyo amalanga amathathu nobusuku bakhona.