UJOBHO 9 - IsiNdebele 2012 Translation

UJobho uyaziphendulela

¹ UJobho waziphendulela wathi:

² “Ngambala, ngiyazi bonyana kunjalo: Obhubhako angeze aba ngolungileko kuZimu.

³ Nakube umuntu ufuna ukujamelana noZimu ebandla, akunambuzo namunye angawuphendula phakathi kweyikulungwana.

⁴ UZimu unobuhlakani obukhulu, uqinile emandleni. Ngubani owakhe wajamelana naye waphumelela?

⁵ Nguye otjhidisa iintaba, zona zingazi, azigubude ngetukuthelwakhe.

⁶ Unyakazisa iphasi alisuse endawenalo, kuthuthumele iinsika zalo.

⁷ Uyala ilanga bona lingakhanyi, agubuzese iinkwekwezi.

⁸ Yena yedwa weneka amazulu, agadange amaza welwandle.

⁹ Wenza iinkwekwezi zeBhere nezesiRuthwana, zesiLimela neendawo lapho zicimela khona ngesewula.

¹⁰ Wenza izinto ezikulu ezingahlathululekiko neemangaliso ezinganakubalwa.

¹¹ Qala, udlula ngakimi ngingamboni, iye, uyadlula ngingayeleli.

¹² Nahlwithako, ngubani ongamkhandela? Ngubani ozakuthi kuye, ‘Wenzani?’

¹³ “UZimu angeze abuyisela itukuthelwakhe emuva, ngaphasi kwakhe abasizi bakaRahabu bathotjisiwe.

¹⁴ Alo, ngingamphendula njani na? Ngiwathathephi amezwi wokujamelana naye?

¹⁵ Nanyana ngimsulwa, angeze ngamphendula, kwaphela ngingazibawela umusa kumjamelanami.

¹⁶ Ngitjho nanyana bengingalila, angiphendule; angikholwa bona ubezakulalela amezwami.

¹⁷ Kunalokho ubezangiwurubaja ngesiwuruwuru, andise imivuvu yami ngaphandle kwesizathu.

¹⁸ Ubengazukuvuma bona ngikhokhe ummoya, kodwana ubezangizalisa ngomunyu.

¹⁹ Nakube kuyindaba yamandla, nguye odlondlobeleko! Nakuyindaba yomthetho, ngubani obezambizela ebandla?

²⁰ Nanyana ngimsulwa nje, ngakhuluma ngimlandu; noma nginganamlandu nje, umlomami ungibeka icala.

²¹ Emanyeni ngimsulwa! Yeke ipilwami ililize, ngiyihlobokile.

²² Sekuyafana koke, kungakho ngisithi, ‘UZimu ubhubhisa omsulwa nokhohlakeleko ngokufanako.’

²³ Lokha isikhukhula nasiletha ukufa msinyana, sinyefula ukuqobeka kwabanganamlandu.

²⁴ Nakuliphasi, uZimu ulinikele ezandleni zabakhohlakeleko; usitha ubuso babagwebi balo. Nakube akusuye, alo, kungaba ngubani?

²⁵ “Amalangami ayarhaba kunomgijimi, ayaphephuka, angaboni ubuhle.

²⁶ Athaya njengesithayamanzi somgaba, anjengekhozi nalidzwebula ukudla kwalo.

²⁷ Nakube bengingalibala isililo sami, ngilise ukunyukubala ngename,

²⁸ bengizokuba nevalo lakho koke ukuhlupheka kwami, ngombana ngiyazi bonyana angeze wahlala ungangibeki icala.

²⁹ Mina vele sengahlala nginomlandu! Alo, ngizakuthi ngisasebenzelani nje?

³⁰ Nangihlamba ngeliqhwa, ngiqophe izandla zami ngesoda,

³¹ uzangidlhunya ngemgodini onedaka, benginyenywe zizambatho zami.

³² UZimu akasimumuntu njengami kobana ngingabangisana naye, nokobana ngingajamelana naye ebandla.

³³ Thana bekunomlamuli phakathi kwethu obengasilawula sobabili,

³⁴ ukuze uZimu asuse intongakhe kimi, nokumesaba kwami kungasabi khona.

³⁵ Khona-ke bengizakukhuluma ngaphandle kokumesaba, ngombana ngiyazi bona anginamlandu.”