UJOBHO 8 - IsiNdebele 2012 Translation

UBhilidadi ukhuluma noJobho kokuthoma

¹ UBhilidadi umTjhurhi waphendula uJobho wathi:

² “Kuzabe kube nini ulokhu ukhuluma njalo? Umlomakho ukhuluma ilize lakolize!

³ UZimu uyahlanakezela ubulungiswa na? OSabekako uyahlanakezela okulungileko na?

⁴ Nakube abantwabakho bonile kuye, ubanikele emandleni wesiphambeko sabo.

⁵ Wena nawungafunisisa uZimu, wenze isibawo sakho koSabekako,

⁶ nakube umsulwa begodu ulungile, ngambala yena uzakuphakamela kuwe, abuyisele umuzi wakho esigeni.

⁷ Nanyana isithomo sakho sibe sincani, isiphetho sakho sizakuba sikhulu kwamambala.

⁸ “Yeke, buza kabadala, ubeke ihliziywakho efundisweni yaboyise,

⁹ ngombana thina singebayizolo, yeke abe akunanto esiyaziko namalangethu ephasini asithunzi.

¹⁰ Bona bazakufundisa, bakuhlahle, bakuyale ngelwazi labo.

¹¹ “Incinini ingamila lapha kunganachibi na? Umgaba ungahluma lapha kunganamanzi na?

¹² Kuzakuthi kungakaphalazi begodu kungakasikwa nokusikwa, kutjhwabe msinyana kunabo boke utjani.

¹³ Zinjalo iindlela zaloyo okhohlwa uZimu, irhuluphelo yonganaZimu iyatjhabalala.

¹⁴ Ithemba lakhe linjengentambo yesiswebu nesisekelo sakhe siyindlwana yeswebu.

¹⁵ Naziyama ngekumbakhe, iyawa, nayikakarelako, ayidzimeleli.

¹⁶ Ufana nomgade omila endaweni enelanga, onamahlumela anabela esivandeni.

¹⁷ Imirajanawo irarela isiqorho, ihlala hlangana namatje.

¹⁸ Kodwana nawuruthulwako endawenawo, indawo leyo ayitjho bona kwakhe kwamilani kiyo.

¹⁹ Lokho kukukwenama kwepilwawo: Equlwanenapho kuzakumila omunye.

²⁰ “UZimu akasoze alahle umuntu omsulwa begodu angeze asekele abenza ubumbi.

²¹ UZimu angazalisa umlomakho ngesihleko godu neembhena zakho ngokuhlokoma.

²² Labo abakuzondako bazakwembathwa mahloni namatende wabakhohlakeleko atjhabalale.”