UJOBHO 7 - IsiNdebele 2012 Translation

UJobho wendlala indabakhe phambi koZimu

¹ “Umuntu obhubhako akadosi emhlweni ephasinapha na? Amalangakhe akasinjengowomqatjhwa?

² Iye, unjengekhoboka elirhuluphela ukuphola kwelanga, nomqatjhwa olubalubela umrholwakhe.

³ Ngaleyondlela, nami ngabelwe iinyanga ezinganamvuzo, ngalinganiselwa amatshwenyeko ubusuku nobusuku.

⁴ Nangilalako ngithi, ‘Kazi ngiyokuvuka nini?’ Ubusuku bungilethele ukuwurubajeka ngihlubayele bekube ngamarimarima.

⁵ Inyamami yembethwe ziimbungu nesila; isikhumba sami siyakokorana, sikhune.

⁶ Amalangami ayarhaba ukuphela kunentambo yomluki, iye, afika ekupheleni kunganathemba.

⁷ “Khumbula bona ipilwami semuphefumulo; amehlwami angeze asabona ubuhle.

⁸ Ilihlo elingiqalileko alisazongibona; amehlwakho azangifuna angasangifumani.

⁹ Njengelifu nalinyamalalako, unjalo nowehlela ethuneni, akasabuyi.

¹⁰ Akasabuyeli ekumbenakhe, abantu bekhabo angeze basambona.

¹¹ “Ngalokho angeze ngavala umlomami; ngifuna ukukhuluma esizini lomphefumulwami, nginghonghoyile ebumunywini behliziywami.

¹² Ngililwandle nanyana unomrhaso welwandle kobana ungabeze ungibekele umlindi na?

¹³ Nangithi, ‘Icasi lami lizangiduduza, umbhedami unciphise isinghonghoyilo sami’,

¹⁴ wena ungisabisa ngamabhudango, ungihlunguphaze ngemibono.

¹⁵ Ngalokho ngikhethe ukukghanywa nokufa kunomzimbami lo.

¹⁶ Kwanje sengiphosele itewu, angeze ngisaphila ukuyaphi. Akhe ungisuduke ngombana amalanga ayile.

¹⁷ Kubayini obhubhako aqakathekile kuwe, kobana ungabeze umtjheje na?

¹⁸ Umkhambela njalo ekuseni, umzizinye umzuzu nomzuzu!

¹⁹ Uzongirhudulela amehlo bekube nini, ngaphambi kobana ungigadunge ngikhokhe ummoya na?

²⁰ Ngikone ngani na? Ngikwenzeni wena hloli yabantu? Kubayini unemba mina? Ngimthwalo kuwe na?

²¹ Alo, kubayini ungacoleli isiphambeko sami, ususe isono sami na? Qala, sele ngizaziyela kwamhlaba, uzangifuna kodwana ngizabe ngingasekho.”