UJOBHO 6 - IsiNdebele 2012 Translation

UJobho uphendula u-Elifasi kokuthoma

¹ UJobho waphendula wathi:

² “Maye, thana isizi lami liyalinganiseka! Nehlekelelami ibekwe esilinganisweni sinye!

³ Kokubili bekuzakuba budisi kunetjhwabatjhwaba yelwandle! Kungebangelo ngikhuluma ngehliziyo ebuhlungu:

⁴ Ngambala imisubela kaZimu oSabekako ingihlabile, ummoyami urhamula isihlungu sayo, ukwesabeka kwakaZimu kuyangiqoba.

⁵ Udumbana webaleni uyalila nakunotjani na? Nekomo iyalila nayinefuru na?

⁶ Okunganandiphiko kungagomeka kunganatswayi na? Kunokunandipha ebumhlopheni beqanda na?

⁷ Umphimbami uyala ukukwamukela, amezwenu afana nokugoma okungigonyulukisako.

⁸ “Inga ngingazwakalisa isibawo sami, uZimu angiphe engikurhuluphelako.

⁹ Kwanga uZimu angangipitliza asuse isandla sakhe, uqunte intambo yepilwami!

¹⁰ Lokho-ke kuzangiduduza godu; ngithabe nanyana ngisebuhlungwini. Akazukungibabalela ngombana azange ngigodle amezwi woCwengileko.

¹¹ Anginamandla wokulinda, anginasikhathi sokwelula ipilwami!

¹² Ngiqine njengelitje na? Inyamami yikoporo na?

¹³ Ngambala anginamdlandla nepumelelo itjhabalalisiwe kimi.

¹⁴ “Kulihlazo emuntwini onyelelela umnganakhe, onjalo udela ukwesaba uZimu oSabekako.

¹⁵ Abafowethu abathembeki, banjengomlanjana wesikhatjhana, iye, bamilanjana egeleza ebusika:

¹⁶ Balithunzi elimnyama nerhwaba, kibo kuzifihla iliqhwa.

¹⁷ Kuthi nakuthoma ukutjhisa banyamalale, nakutjhisako banyelele endawenabo.

¹⁸ Imilanjana leyo iphumbutha indlelayo, iphelele erhalawumbeni bese iyanyamalala.

¹⁹ Imilandelande yeTema yazuma imilanjana leyo; idwendwe elisuka eTjheba larhuluphela amanzayo.

²⁰ Ladana ethembeni lalo, lafika lapho lakhungatheka.

²¹ Ninjalo-ke nina kimi: Lokha nanibona ihlekelele, niyacimela.

²² “Nikhe nangizwa ngitjho okulandelako na? ‘Yeningiphe okuthileko! Ngisikelani emnonwenenu ukuze ngifumbathise!

²³ Ngenyelani esandleni somjamelani!’ namkha, ‘Ngihlengani ezandleni zeenrhonga!’

²⁴ Yeke ngifundisani, khona ngizakuthula, ningibonise bona ngiyitjhaphe kuphi.

²⁵ Iqiniso alibulali! Kodwana ukungisola kwenu akusizi.

²⁶ Nidlumbana bona ningakhalima ngamezwi lokha nanithatha amezwi womuntu odangeleko njengommoya na?

²⁷ Nenza ifumbe ngentandani, nenaniselane ngomnganenu!

²⁸ Akhe ningiqale emehlweni. Ngiyafunga, angeze nganikhohlisa!

²⁹ Akhe niphenduke ngiyanibawa, akungabi nobumbi. Iye, phendukani! Indabami inetlha,

³⁰ akukho ukonakala elimini lami, ngiyizwile ihlekelele bona injani!”