UJOBHO 5 - IsiNdebele 2012 Translation

U-Elifasi usakhuluma

¹ “Nawubizako, uzakuphendulwa ngubani? Ngisiphi seendalwa zezulu ozakuphendukela kiso na?

² Ngambala itukuthelo kaZimu iyasibulala isidlhadlha nesikhwele sakhe simadlha isidlhamatletle.

³ Mina ngikhe ngabona isidlhadlha siphumelela, khonapho ikumbaso yaba sisiga sokuthuwelelisa.

⁴ Abantwabaso abakavikeleki, indababo ayithathwa ebandla, akakho obasekelako.

⁵ Isivuno saso sigonywa bomalambana, basithuthela hlangana nameva; imigulukudu leyo irharhela ilifa laso.

⁶ Ngambala ukonakala akuveli ethulini nehlekelele ayiqubuki equlwanini:

⁷ Umuntu unemvelo yokonakala asabelethwa njengombana kuyimvelo yedlanga ukuphaphela phezulu.

⁸ “Thana benginguwe, bengizazifunela uZimu, ngethule kuye indabami.

⁹ Nguye ongumenzi wokukhulu nokungahlathululekiko okuzizinto ezimkariso nezinganasibalo:

¹⁰ Unisa izulu phezu komhlaba, athumele amanzi phezu kwemimango

¹¹ ukuze aphakamisele phezulu labo abaphasi, abalilako abanyusele ekwenameni.

¹² Utjharaganisa amaqhinga wamaqili, ukuze izandla zawo zingaphumeleli.

¹³ Abahlakaniphileko ubabamba ngobuqili babo, amaqhinga wamaqili apheliswe msinyana.

¹⁴ Emini bahlangana nobumnyama, baphumbuthe inga kusebusuku.

¹⁵ Iye, uZimu usindisa abadududu esabuleni, emlonyeni nezandleni zabanamandla,

¹⁶ ukuze abakhwahlileko babe nethemba begodu ukungalungi kuvaleke umlomo.

¹⁷ “Tjheja-ke, ubusisiwe umuntu okhalinywa nguZimu, yeke unganyazi ukusolwa ngoSabekako.

¹⁸ Iye, ubanga ubuhlungu, kodwana uyapholisa, godu amadlhe, kodwana isandla sakhe sibuye selaphe.

¹⁹ Uzakwenyula kasithandathu ematshwenyekweni, nakwesikhomba kungabi nobumbi obukuthintako.

²⁰ Nakunendlala uzakuhlenga ekufeni, nakunepi akuhlenge emandleni wesabula.

²¹ Uzakuvikeleka elimini elinesihlungu, ungesabi ukubhujiswa nakukufikelako.

²² Uzakuhleka ukubhujiswa nendlala, angeze waba nevalo ngeembandana zephasi;

²³ ngombana uzakuba nesivumelwano neenlwana, iimbandana zommango zilawulwe nguwe.

²⁴ Uzakwazi bonyana itende lakho liphephile, nawuhlola ipahlakho, kungabikho elahlekileko.

²⁵ Godu uzakwazi bona iinzukulwana zakho zizakwanda, nabantwabakho bahlume njengotjani ehlabathini.

²⁶ Ithuna lakho lizakwamukela sele ukhulile, kube njengesithala sekoroyi nasiwela eselelweni ngesikhathi sakhona.

²⁷ Iye, sikuhlolile lokhu, yeke kuliqiniso. Kulalele, ulemuke bese uyakusebenzisa.”