UJOBHO 41 - IsiNdebele 2012 Translation

¹ Ungakhupha ingwenya ngemanzini ngesikghopholahlambi, uvalele ilimu layo ngokubopha umlomayo ngentambo na?

² Ungaphundlusa ipumulwayo ngomgaba, namkha ubhoboze umhlathayo ngesikghopholahlambi na?

³ Izalokhu ikuncenga, ikhulume kuwe amezwi athambileko na?

⁴ Izakubawa ukwenza nawe isivumelwano, sokobana uyithathe ibe likhoboka lakho isiphelani na?

⁵ Ungayenza ifuyosithandwa njengenyoni ebotjhwa ngomtiya enyaweni, ukuze umntazanakho adlale ngayo na?

⁶ Abarhwebi bangaphalisana ngentengwayo, abathengi babelane ngayo na?

⁷ Ungazalisa isikhumba sayo ngamasungulo nehlokwayo ngemikhonto yokubamba iinhlambi na?

⁸ Nawubeka isandla sakho phezu kwayo, uzakhumbula bona ipi injani; angeze bewusathoma!

⁹ Loke ithemba lokuyibamba lililize. Ukuyibona nje kwaphela uyaketuka!

¹⁰ Akakho noyedwa onesibindi sokuyiphaphamisa, abuye ajame phambi kwayo!

¹¹ Ngubani ongayisahlela ahlale angalimali na? Ngaphasi komthunzi welanga, ngimi ngedwa oyilawulako.

¹² “Yithi ngikutjele ngengubayo, ngamandlayo ababazekako begodu ayifaniseki:

¹³ Ngubani ongayembula isambatho esingaphakathi, ayihlubulise imbajayo yepi na?

¹⁴ Ngubani ongagabaza ayivule umlomo, ogegwe mazinyokazi asabekako?

¹⁵ Umhlanayo unomsele ophahlwe marhururhuru, abophene aba mlukuluku

¹⁶ abekwa aminyaniswa kangangobana akunammoya ongadlula hlangana.

¹⁷ Ahlanganiswe ndawonye, aqiniswa, anamathelene begodu angeze ahlukaniswa.

¹⁸ “Nayithimulako umrhwamuko uyaphazima, amehlwayo afana nemisebe yokusa.

¹⁹ Emlonyenayo kuphuma iinhlothi ezivuthako, kusabalale iinsahlela zawo.

²⁰ Eempumulweni zayo kuphuma isikhutha, inga siphuma embizeni ebilako emalahleni avuthako.

²¹ Ukuphefumula kwayo kungavuthisa amalahle namalangabi aphuma emlonyenayo.

²² Amandla alele entanyenayo, ukwesabeka kukhamba phambi kwayo.

²³ Amakghwakghwa womzimbayo anamathelene, akghamathele phezu kwayo, akasuki.

²⁴ Ihliziywayo iqine njengedwala, iye, iqine njengelitje lokusila.

²⁵ Lokha nayiphuma ngemanzini, abanamandla bayathuthumela, nayiphundluka esizibeni, bayahlehla.

²⁶ Isabula efika kiyo ayiyenzi litho, ngitjho nomkhonto, neminye imihlobo yeenkhali.

²⁷ Kiyo isimbi iba ngathi ziinhlanga, ikoporo ifane nesigodo esinepehli.

²⁸ Imisubela ayiyenzi ibaleke, amatje wesarwayi afana neenhluba kiyo.

²⁹ Iye, ngitjho nesibhuku sifana nehlanga kiyo; ihleka ukukhecezela kwezenjana phezu kwayo.

³⁰ Ilingaphasi layo lifana neenkghedlhu zembiza, liveza umtlhala edakeni inga lidosa isileyi sokubhula.

³¹ Yenza ukuzika kubile njengembiza, inyakazise isiziba inga yimbiza yeenthako.

³² Ngemva kwayo kunomthala ophazimako ngemanzini, kube ngathi ukuzika kuthukghele.

³³ “Akunalitho emhlabenapha elilingana nayo, mbala isidalwa esinganavalo.

³⁴ Ikuqalela phasi koke okuziphakamisako, iyikosi phezu kwakho koke okuzikhukhumezako.”