UJOBHO 4 - IsiNdebele 2012 Translation

U-Elifasi uphendula uJobho kokuthoma

¹ U-Elifasi umTemani waphendula wathi:

² “Nange umuntu angakhuluma nawe ungakhubeka na? Nokho-ke, akunamuntu ongathula nakunje.

³ Qala, ufundise abanengi, waqinisa abazandla zibuthakathaka.

⁴ Amezwakho abe sisekelo kokhutjwako, waqinisa abamadolo nzima.

⁵ Kodwana nasele zibuya ngawe, uphela amandla, nawuthintekako, uyakakamala.

⁶ Kanti ukwesaba kwakho uZimu, akukuqinisi na? Ubuqotho bepilwakho, abusilithemba lakho na?

⁷ Akhese ucabangisise kuhle: Wakhe wabonaphi omsulwa atjhabalaliswa na? Kukuphi lapha olungileko akhe abhujiswa khona?

⁸ Mina-ke ngokubona kwami: Labo abalima ikohlakalo, batjale isizi, bavuna abakutjalileko.

⁹ UZimu naphefumulako, bayabhubha, navuthela ngobukhali bakhe, bayaphela.

¹⁰ Ukubhodla kwebhubezi, ilizwi lengwenyama ethukutheleko namazinyo webhubezana akuwasizi.

¹¹ Ikosi yeenyamazana izulazula inganakudla namawundlu webhubezikazi aphadlhalele.

¹² “Ilizwi leza kimi ngefihlakalo, indlebami yezwa umhlebezwana,

¹³ emizindlweni yemibono yamabhudango, lokha abantu nababanjwe buthongo.

¹⁴ Ngehlelwa kukwesaba nokuthuthumela, amathambami woke aqhaqhazela.

¹⁵ Kwavela isithunzi ebusweni bami, kwaphakama iinhluthu ehlokwami.

¹⁶ Isithunzeso sajama rwe, azange ngazi bona yintobani. Kwathi isigeso sisajame phambi kwami njalo, ngezwa ilizwi elihlebezako lithi,

¹⁷ ‘Obhubhako angaba neqiniso ngaphezu koZimu na? Umuntu angaba msulwa ngaphezu komDali wakhe na?

¹⁸ Qala, uZimu akanikeli iindalwa zezulu ukuzilawula begodu neengilozi zakhe uyazisola nazenza iimphoso.

¹⁹ Alo, bebayini-ke abahlala eenkumbeni zamasoyi, ezidzimelele esisekelweni sethuli, abapitlizeka lula njengomuhlwa na?

²⁰ Babhujiswa ngalanga linye batjhabalala unomphela banganakwa.

²¹ Angithi nakuqhusulwa intambo yamatendabo, bayafa ngokungazi kwabo!’ ”