UJOBHO 3 - IsiNdebele 2012 Translation

UJobho unikelela ilanga abelethwa ngalo

¹ Ngemva kwalapho uJobho wavula umlomakhe wathuwelelisa ilanga abelethwa ngalo.

² Wathoma ukukhuluma wathi:

³ “Alibhubhe ilanga engabelethwa ngalo nobusuku obathi, ‘Isibeletho sibambe umtwana womsana.’

⁴ Ilangelo alibe bumnyama, uZimu ongaphezulu angalibali, kungabi nomkhanyo mhlokho.

⁵ Alembathwe bumnyama, iye, ubumnyama obunzima tshu; amafu aligubuzese, lisatjiswe lithunzi elinzima lesiwuruwuru.

⁶ Kwanga ubumnyama bungasula ubusukobo; bungabalwa namanye amalanga womnyaka, bungabi nendawo emalangeni weenyanga.

⁷ Ubusukobo abube yinyumba, kungazwakali ukulilizela kibo.

⁸ Abanikelela amalanga abahlolozele ubusukobo, iye, abanekghono lokutlhorholoja unomrhaso welwandle.

⁹ Iinkwekwezi zobusukobo azibe mnyama, buhlulukele umkhanyo, kodwana ungabikhona, bungaboni nokudabuka kokusa,

¹⁰ ngombana bungakavali iminyango yesibeletho sakamma, namkha bufihlele amehlwami amatshwenyeko.

¹¹ “Ngangingafilini-ke ekubelethweni kwami, ngiphume esibelethweni ngife?

¹² Amathanga avumeleni ukungamukela? Amabele avumeleni ukungimunyisa?

¹³ Ngombana ngabe ngizilalele ngithulile, iye, ngilele, ngiphumulile ethuneni;

¹⁴ ngilele namakhosi nabeluleki bephasi, labo ebegade bavuselele amarubhi,

¹⁵ namkha ngilele namakhosana egade anegolide, azalisa iinkumba zawo ngesiliva.

¹⁶ Kubayini ngingazange ngifihlwe equlwanini njengombungu orhulukileko, iye, njengesana elingazange libone ilanga?

¹⁷ Ethuneni iinkhohlakali zilisa ukuba yipehli, abadiniweko bayaphumula.

¹⁸ Lapho, iimbotjhwa ziphumula ndawonye, zingasezwa ilizwi lomgandelelazo.

¹⁹ Lapho, kunabakhulu nabancani, nekhoboka litjhaphulukile emphathinalo.

²⁰ Kubayini uZimu aphilisa osesizini, nabamunyu emmoyeni?

²¹ Abantwabo bahlulukela ukufa, kodwana kungafiki, bakurhubhe inga baphenya amagugu;

²² bathabe ngokweqileko, bathokoze lokha nabafumana ithuna.

²³ Kubayini uZimu aphilisa ongaboni indlela, iye, loyo uZimu amvalele umzila?

²⁴ Isibibithwana sami kwanga sisikwa kimi, nokububula kwami kugobhoza njengamanzi.

²⁵ Ngambala into ebengiyesaba ingehlele, ebekungethusa kungigubuzesile.

²⁶ Ngiyawurubajeka, anginakuthula, ngiyahlubayela, anginakuphumula, umtlhago ungembethe.”