UJOBHO 2 - IsiNdebele 2012 Translation

Umphikisi usaragela phambili nokulwisa uJobho

¹ Godu kwaba nelanga lapha amadodana kaZimu aziveza khona phambi kwakaSomnini, nomphikisi wazifaka hlangana nawo naye waziveza phambi kwakaSomnini.

² USomnini wathi kumphikisi: “Uvelaphi-ke wena?” Umphikisi wathi: “Gade ngizulazula ephasini, ngehla ngenyuka.”

³ USomnini godu wathi kuye: “Uthi khewatjheja nje ngencekwami uJobho? Akunamuntu ofana naye ephasini, uyindoda eqotho nethembekileko. Ngokwesaba uZimu ubalekela ubumbi. Usadzimelele ekubeni qotho nanyana ungitjitjizele bona ngijamelane naye, ngamlobisa ngaphandle kwesizathu.”

⁴ Umphikisi waphendula wathi: “Ubuhlungu busesikhunjeni! Umuntu uzakunikela koke anakho ikani azakusindisa ipilwakhe.

⁵ Yeke nange ungelula isandla sakho umthinte enyameni nemathanjenakhe, ngiyakutjela ngithi uzokuthuka emtarini.”

⁶ USomnini wathi kumphikisi: “Qala, ngimnikele esandleni sakho, kwaphela ungathinti ipilwakhe.”

⁷ Yeke umphikisi wasuka phambi kwakaSomnini wayokuhlunguphaza uJobho ngamathumba ukusukela ngaphasi kweenyawo bekube sefokothweni.

⁸ UJobho wathatha isiqetjhana sediko wazirhwaya ngaso, wahlala ezaleni.

⁹ Umkakhe wathi kuye: “Usabambelele ekubeni qotho kwakho na? Thuka uZimu lo, ufe.”

¹⁰ Kodwana yena wathi kuye: “Ukhuluma njengesidlhadlha somfazi. Kanti sizakwamukela okuhle kwaphela kuZimu singasamukela nokumbi na?” Kikho koke lokho uJobho azange one begodu azange akhulume litho elimbi.

¹¹ Kuthe bona abangani abathathu bakaJobho bezwe ngakho koke okumbi okumehleleko, beza omunye nomunye abuya lapha ahlala khona. Bahlangana kobana baye kuJobho bayomtjhiriya. Bona bekungu-Elifasi umTemani, uBhilidadi umTjhurhi noTsofara umNama.

¹² Kwathi lokha nabambona basesebuqamamana, kwaba bukhuni ukumfanisa. Bathoma ukurhahlawula, badabula iimphuraphura zabo, bazirhatjha ngethuli eenhloko.

¹³ Bahlala equlwanini noJobho loyo amalanga alikhomba nobusuku bakhona. Akakho owaba nelitho alitjhoko kuJobho ngombana bebabona bonyana udosa emhlweni kangangani.