UJOBHO 16 - IsiNdebele 2012 Translation

Ipendulo kaJobho

¹ UJobho waphendula wathi:

² “Ngizwe izinto ezinengi ezinjalo; nibaduduzi abambi nokanyana njalo.

³ Lesi sikhathi samezwenu amumoya na? Nakungasinjalo, nitjhiswa yini beniphikise na?

⁴ Nami bengingakhuluma njengani nje, nabegade kungini lapha ngikhonapha; bengingabumba amezwi ngiphikisane nani, nami ngithintithe ihloko nanginiqalako.

⁵ Benginganikhuthaza ngomlomami kwaphela, induduzo yeembhena zomlomami inibangule.

⁶ Madoda, ukukhuluma ngobuhlungu bami, akubenzi budambe, begodu nangithulako nakhona abusuki kimi.

⁷ “UZimu lo, nguye ongiqede amandla, wakhenisa woke umkhambathami.

⁸ Ungenze ngaba sibonelo sehlekelele, ukonda kwami kujamelene nami, kufakazela amanga wabantu ngami.

⁹ Itukuthelo kaZimu ingirathule, ngombana ungibambele ivunda; wangisinela amazinywakhe, umjamelanami wangiqala ngamehlo abukhali.

¹⁰ Abantu bangikhamisela imilomo, bangiphoqa ngokungiwakala emhlathini, bangihlalela isicathana.

¹¹ UZimu unginikelele ngemigulukudu, wangilahlela ezandleni zeenkhohlakali.

¹² Bengizihlalele, wangiqovaqova, wangithi bhi ngentanyana wangidabudabula. Wangijamisa ngaba sinenjwa,

¹³ imisubelakhe yawela ngapha nangapha kwami, yangihlaba iziso. Ngaphandle kwesirhawu yachithela inyongwami equlwanini.

¹⁴ Ungivula iintunja ngeentunja, angithelekele njengengorho.

¹⁵ “Ngithungelele umgodla esikhumbeni sami, ihlokwami izele ngomlotha.

¹⁶ Ubuso bami buba bumbi ngesililo neenkopheni zami kunobumnyama obunzima tshu,

¹⁷ nanyana kungananturhu ezandleni zami, nomthandazwami uhlambulukile.

¹⁸ Wena phasi, ungafihli iingazi zami, isililo sami asingafumani ukuphumula.

¹⁹ Nanyana ngingaba njengombana nginje, kwanga ngingaba nofakazi phakathi kweendalwa zezulu, ozokukhuluma indabami keliphezulu,

²⁰ iye, umkhulumelami, omnganami, lokha amehlwami achiphizela uZimu ngeenyembezi.

²¹ Yena uzakuncengela obhubhako phambi koZimu, njengomuntu nancengela umnganakhe.

²² Mbala, sekusele iminyakana embalwa ngaphambi kobana ngikhambe indlela engabuyiko.