UJOBHO 12 - IsiNdebele 2012 Translation

UJobho uphendula uTsofara

¹ UJobho waphendula wathi:

² “Ngambala nibabantu bekhethu! Nanihlongakalako nokuhlakanipha kuzokunyelela!

³ Nami nginomkhumbulo njengani; angisingaphasi kwenu. Ngubani ongakwaziko okutjhwileko?

⁴ Ngiyihlekisa emnganinami, uthi, ‘Qala, ubiza uZimu, akamphendule-ke.’ Kunjalo-ke ukunyefula konganamlandu nomsulwa!

⁵ Umbono wozigedlileko lo uthi, ‘Ungatshwenyeki ngehlekelele! Ilungiselelwe abangakhambi kuhle.’

⁶ Kodwana ngithi, ‘Abarhayilako baphila ngokuthula, nabatlhorholoja uZimu bavikelekile, ngitjho labo uZimu abanikele amandla ezandleni zabo!’

⁷ Iye, buzani iinlwana, zizanifundisa, nibuze neenyoni zomkayi, zizanitjela.

⁸ Yelelani iinunwana zequlwani, zizanifundisa, neenhlambi zelwandle zinidembele.

⁹ Ngisiphi sazo zoke iinlwanezo esingaziko bonyana sisandla sakaSomnini esenza lokhu.

¹⁰ Esandleni sakhe kunepilo yakho koke okuphilako, kanye nomphefumulo womuntu woke.

¹¹ Indlebe izizinya amezwi, njengelimu linandipha ukugoma.

¹² Ukuhlakanipha kusebantwini abadala na? Nokwazi kusekuphileni isikhathi eside na?

¹³ Awa, ukuhlakanipha namandla kukuZimu, nguye oneseluleko nokwazi.

¹⁴ Nagirizako, akunamuntu ongavuselela; navalela umuntu, akakho ongamvulela.

¹⁵ Lokha nagodla izulu, amanzi ayatjha nalithumelako, amanzi akhukhula inarha.

¹⁶ UZimu nguye onamandla nohlosa koke, ulawula odurhileko nodurhisako.

¹⁷ Nguye okhambisa abeluleki bahlubule, enze abakhokheli iindlhadlha.

¹⁸ Unikela amakhosi ezitheni zawo esangweni awabophe ngebhande letjhila emadinini.

¹⁹ Ukhambisa nabaphristi bahlubule; aphelise iinkhundla zabo zeminyaka neminyaka.

²⁰ Uthulisa iseluleko sabathembekileko, amuke abaphathi umbono.

²¹ Uthela amakhosana ngehlazo, onamandla amthukulule ibhande.

²² Wembula amaqhinga afihlakeleko, okwenziwe ebumnyameni akulethe ekukhanyeni.

²³ Wandisa izizwe, abuye azibhubhise, azinabise, azirholele ekuthunjweni.

²⁴ Wemuka amakhosi wephasi ukwazi, awenze azulazule ebhudwini elinganandlela.

²⁵ Aphumbutha ebumnyameni kunganamkhanyo, awenze atherezele njengesidakwa.