UJOBHO 11 - IsiNdebele 2012 Translation

UTsofara ukhuluma noJobho kokuthoma

¹ Yeke uTsofara umNama waphendula wathi:

² “Amezwi amanengi kangaka akazukuphendulwa na? Ukuphophotha kangaka kuzakwenza oqinisileko na?

³ Ikulumakho engazisiko leyo izakuthulisa abantu na? Ukuhlahlatha kwakhokho akuzukukuveza emtarini na?

⁴ Uthi, ‘Indabami inetlha’, begodu uthi kuZimu, ‘Ngimsulwa kuwe’.

⁵ Maye, kwanga uZimu angakhuluma, iye, akhulume nawe umlomo nomlomo!

⁶ Inga angakwembulela iimfihlakalo zokuhlakanipha! Ukuhlakanipha kwakhe kunepumelelo epheleleko. Nje-ke, uzakwazi bona isibetho sakaZimu kuwe sincani kunomlandwakho.

⁷ Ungazifunyana iimfihlakalo zakaZimu na? Sewuyifikelele imikhawulo yoSabekako na?

⁸ Iphakeme ngaphezu kwamazulu! Yini nje into ongayenza wena ngalokho? Itjhinge khulu kunendawo yabafileko! Lilwazana bani ongaba nalo wena?

⁹ Isilinganiso sayo sinabile kunephasi, begodu sibanzi kunelwandle.

¹⁰ UZimu nadlulako, ufaka umuntu ekufeni, bese kuthi omunye amgcine aphilile. Akakho ongamkhandela kilokho.

¹¹ Nguye owazi abaphehli benturhu, ubona ubukhohlakali akude. Akadingi ukutjhidela eduze azokuphenya!

¹² Njengomjeka ofakwa emlilweni uphekwe unganalitho, injalo nehloko yomuntu. Iye, ubelethwa anjengodumbana wommango.

¹³ “Wena-ke nawulungisa ihliziywakho, uzakwelulela izandla zakho kuZimu.

¹⁴ Nakube kunesono esandleni sakho, silahle! Ungavumeli ubukhohlakali emzinakho!

¹⁵ Nawenze njalo, uzakuphakamisa ubuso bakho umsulwa, ube ngoqinileko, ungabi nevalo.

¹⁶ Mbala uzakukhohlwa amatshwenyekwakho; uzawakhumbula inga mamanzi ageleze adlula.

¹⁷ Ipilwakho izakuphakama kunelanga eminekulu, izakuphazima njengelanga lekuseni.

¹⁸ Uzakuba nesibindi ngombana ithemba likhona; uzakuqaphela ipahlakho, uphumule uphephile.

¹⁹ Uzakulala uzigedle, kunganamuntu okusabisako. Abanengi bazazincengela kuwe,

²⁰ kodwana amehlo wabakhohlakeleko azokufifiyela. Bangabi nendawo yokuphephela, ithemba labo lizakuba kuphelelwa mamandla.”