UJOBHO 10 - IsiNdebele 2012 Translation

UJobho ubalisa kuZimu

¹ “Ngiyayinyenya ipilwami; ngifuna ukuzwakalisa isililo sami ngitjhaphulukile, ngikhulume ebumunywini bomphefumulwami.

² Yeke ngizakuthi kuZimu, ‘Ungangibeki icala, ngazisa bonyana kubayini ujamelene nami.

³ Kghani uyakareka nawumgandeleli, ulahle umsebenzi wezandla zakho na? Ingabe uthanda amaqhinga weenkhohlakali?

⁴ Uthi unamehlo wenyama nje? Ubona ngendlela obhubhako abona ngayo?

⁵ Imihla yakho ifana neyobhubhako na? Iminyakakho ifana neyomuntu na?

⁶ Kubayini ubhenyegulula imitjhaphami, urhubhulule izono zami,

⁷ nanyana wazi bonyana anginamlandu, begodu akakho ongasindisa esandleni sakho?

⁸ Izandla zakho zangibumba, zangitshidza, ngemva kwalokho wangijikela, wangirhayila.

⁹ Khumbula bonyana ungenze ngomdaka, nje-ke uzangibuyisela ethulini.

¹⁰ Azange ungithulule njengebisi, wangitjhujisa njengetjhizi na?

¹¹ Wangembathisa inyama nesikhumba, wangiluka ngokuhlanganisa amathambo nemisipha.

¹² Wangipha ipilo ngokwethembeka kwakho, netjhejo lakho labulunga umphefumulwami.

¹³ Izinto engihlupheka ngazo wazifihla ehliziywenakho; kodwana manje ngiyazi bonyana lokhu kuyihloswakho ngami:

¹⁴ Nakube bengingona, wena bewuzangelusa, bewungeze wathethelela ukona kwami.

¹⁵ Nakube benginomlandu, maye mina! Nabe gade ngilungile, bengingeze ngavusa ihloko ngombana ngizele ihlazo ngobuhlungu engibuzwako.

¹⁶ Nakube bengingaphakamisa ihlokwami, bewuzangizuma njengebhubezi, godu ungigandelele ngamandlakho amakhulu!

¹⁷ Uvusa abofakazi abatjha abajamelene nami, wandisa itukuthelwakho kimi, ukuhlupheka kwami kuza ngokudlhegana.

¹⁸ Alo, wangikhuphelani esibelethweni? Ngathana ngafa ngingakabonwa nangelihlo,

¹⁹ ngaba njengongazange abe khona, ngithathwe esibelethweni ngisiwe ezindleni.

²⁰ Amalanga wokuphila kwami ambalwa. Yeke akhese ungigadunge! Lisa ukunginaka ukuze ngithabe kwesikhatjhana;

²¹ ngaphambi kobana ngiye kwamgodi uyagcina, enarheni enobumnyama obunzima tshu;

²² iye, inarha enethunzi elinzima nesiyaluyalu, lapha umkhanyo wakhona inga bumnyama.’ ”