UJOBHO 1 - IsiNdebele 2012 Translation

Umuntu omsulwa uyatlhaga

¹ Kwakukhona indoda enarheni ye-Utsi ebekuthiwa nguJobho. Indoda leyo gade imsulwa begodu iqotho. Ngokwesaba uZimu, beyibalekela ubumbi.

² Beyinamadodana alikhomba namadodakazi amathathu.

³ Beyinezimvu neembuzi eziziinkulungwana ezilikhomba, amakamela aziinkulungwana ezintathu, ikulungwana yeenkomo ezibotjhelwako, amakhulu amahlanu wabodumbana abasikazi kanye neensebenzi ezinengi kwamambala. Gade ayindoda enjinge ukudlula woke umuntu enarheni engepumalanga.

⁴ Amadodanakhe gade avame ukugega ngokweenkumba zawo enze imigidi, ameme nabodadwawo abathathu kobana bazogoma bebasele ndawonye.

⁵ Bekuthi kungaphela umzombe wemigidi leyo, uJobho abize abantwabakhe abahlambulule. Gade avuka ekuseni bese abenzele imihlabelo yokutjhiswa ukuya ngokwesibalo sabo boke ngombana uJobho gade adlumbana asithi: “Kungenzeka abantwabami bone ngokuthuka uZimu eenhliziyweni zabo.” UJobho gade enza lokho ngeenkhathi zoke.

Umphikisi ulwisana noJobho

⁶ Kwaba nelanga mhlana amadodana kaZimu aziveza khona phambi kwakaSomnini nomphikisi weza wazifaka hlangana nawo.

⁷ USomnini wabuza umphikisi wathi: “Uvelaphi-ke wena?” Umphikisi wathi: “Gade ngizulazula ephasini, ngehla ngenyuka.”

⁸ USomnini wathi kuye: “Uthi khewatjheja nje ngencekwami uJobho? Akunamuntu ofana naye ephasini, uyindoda emsulwa neqotho. Ngokwesaba uZimu ubalekela ubumbi.”

⁹ Umphikisi waphendula uSomnini wathi: “UJobho wesaba uZimu ngelize na?

¹⁰ Angithi umbiyele ngomthangala kanye nomzakhe nakho koke anakho. Ubusise umsebenzi wezandla zakhe, ngalokho imihlambakhe yandile enarheni.

¹¹ Kodwana nawelula isandla sakho uthinte koke anakho gadesi, ngiyakutjela ngithi uzakuthuka emtarini.”

¹² USomnini wathi kumphikisi: “Qala, koke anakho ngikunikela esandleni sakho, kodwana yena ngenyama ungamthinti.” Yeke umphikisi wasuka phambi kwakaSomnini.

¹³ Ngelinye ilanga amadodana namadodakazi kaJobho gade agoma begodu asela iwayini ngekumbeni yezibulo.

¹⁴ Khonapho kweza isigijimi kuJobho sathi: “Iinkomo gade zilima, abodumbana bakarula utjani hlanu kwazo,

¹⁵ kwavela amaTjheba asahlela iinceku zakho ngesabula, athatha zoke iinkomo nabodumbana. Ungibona nginje sengimi ngedwa ophunyurhileko, nje-ke ngithe angizokubikela.”

¹⁶ Kwathi sisakhuluma njalo kwafika esinye sathi: “Kwehle umbani esibhakabhakeni warhadla izimvu neembuzi kanye neenceku zakho. Sekwaba ngimi ophunyurhileko ngathi angizokubikela.”

¹⁷ Kwathi naso sisakhuluma njalo kwafika esinye isigijimi sathi: “AmaKasidi eze ngeenqhema ezintathu afese asahlela iinceku azibulala ngesabula abe athumba amakamela. Ungibona nginje, sengimi ophunyurhileko ngathi angizokubikela.”

¹⁸ Naso kuthe sisakhuluma njalo kwafika esinye sathi: “Amadodanakho namadodakazakho gade agoma, asela iwayini ngekumbeni yezibulo,

¹⁹ qala, sekwavela isiwuruwuru erhalawumbeni samadlha phasi amaswazi womane wekumba, yawela phezu kwabantwabakho. Bahlongakele boke, sekwaba ngimi ophunyurhileko ngathi angizokubikela.”

²⁰ Yeke uJobho wasikima, wadabula iphuraphurakhe, waguda ihlokwakhe, wawa ngobuso

²¹ wathi: “Ngavela ngibulanzi esibelethweni sakamma, ngizakubuyela ehlabathini nginjalo. USomnini bekangiphile, uSomnini uthethe; alithokozwe ibizo lakaSomnini!”

²² Kikho koke lokhu uJobho azange one namkha asole uZimu ngobumbi.