UJAKOPO 5 - IsiNdebele 2012 Translation

Ukusolwa kwabaziinjinga

¹ Nje-ke lalelani nina njinga; lilani nirhahlawule ngebanga leenhlupheko ezizanehlela.

² Umnotho wenu wonakele neengubo zenu zidliwa yitshwele.

³ Igolide nesiliva lenu kukghorile, ukukghora lokho kuzokuba bufakazi obujamelene nani, kudle imizimba yenu njengomlilo. Nibuthelele umnotho emihleni le yokugcina.

⁴ Qalani, umvuzo weensebenzi ezisebenza emasiminenu eniwugodle ngobukhwebetjhana uyalila; begodu ukulila kwabavuni kufikile eendlebeni zakaSomnini uMinimandlawoke.

⁵ Ephasinapha niphile ngokuzigedla nokuzithokozisa, ninonisele iinhliziyo zenu mayelana nelanga lokuhlatjwa.

⁶ Nilahle benabulala onganacala, iye, onganiphikisiko.

Ukunyamezela

⁷ Ngalokho nyamezelani, bazalwana, bekufike ilanga lokubuya kweKosi uJesu. Qalani, umlimi ulindela isithelo sephasi esiligugu, asinyamezelele bekube lizulu lokuthoma nelokugcina.

⁸ Nani-ke nyamezelani niqunge isibindi ngombana ilanga lokubuya kweKosi uJesu libandamele.

⁹ Bazalwana, ningavungamelani ukuze ningagwetjwa; qalani, uMgwebi ujame emnyango.

¹⁰ Thathani ukunyamezela nokuhlupheka kwabaphorofidi abakhuluma ebizweni lakaSomnini njengesibonelo.

¹¹ Qalani, sibathatha bona babusisiwe labo abanyamezelako. Nezwa ngokunyamezela kwakaJobho, benabona umnqopho kaSomnini kobana mbala uSomnini unezwelo nesirhawu.

Isiyeleliso sokugcina

¹² Ngaphezu kwakho koke bazalwana, ningafungi; kungaba ngezulu namkha ngephasi nanyana nangasiphi isifungo. U-iye wenu akabe ngu-iye; u-awa wenu abe ngu-awa ukuze ningalahlwa.

¹³ Kukhona ohluphekako hlangana nani na? Akathandaze. Kukhona owenamileko na? Akadumise.

¹⁴ Kukhona ogulako hlangana nani na? Akabize abaphathi bebandla bamthandazele bebamzese ngamafutha ebizweni lakaSomnini.

¹⁵ Umthandazo wokukholwa uzamsindisa ogulako, uSomnini amvuse, nanyana enze izono uzakulitjalelwa zona.

¹⁶ Ngalokho-ke vumani izono omunye komunye, nithandazelane ukuze niphiliswe. Umthandazo wolungileko unamandla begodu uyasebenza.

¹⁷ U-Elija bekamumuntu ofana nathi, wathandaza ngokuncama bona izulu lingani, mbala azange lana ephasini iminyaka emithathu neenyanga ezintandathu.

¹⁸ Wabuye wathandaza godu, umkayi wawulula izulu, iphasi labuye lathela iinthelo zalo.

¹⁹ Bazalwana bami, nangabe omunye hlangana nani uduka eqinisweni, omunye ambuyise,

²⁰ yazini bona loyo obuyise isoni ekulahlekeni kwaso, usindise umphefumulwaso ekufeni begodu ugubuzesa nezono ezinengi.