UJAKOPO 4 - IsiNdebele 2012 Translation

Ukuzithoba kuZimu

¹ Izipi nokuphambana kuvelaphi hlangana nani na? Akuveli eenkanukweni zenu ezilwa njalo nani na?

² Niyafisa kodwana anifumani ilitho; ngalokho niyabulala. Nifuna izinto kodwana anizifikeleli, ngalokho niyararana nilwe. Aninalitho ngombana anibawi.

³ Niyabawa ningaphiwa ngombana nibawa kumbi kobana nithokozise iinkanuko zenu.

⁴ Nina nhlobongi, anazi bona ukuthanda iphasi kububutha kuZimu na? Ngalokho okhanuka bona abe mngani wephasi, uzenza isitha sakaZimu.

⁵ Kghani nidlumbana bona kulilize lokho okutjhiwo mtlolo nawuthi “uMoya uZimu ambeke bona ahlale kithi, unesikhwele” na?

⁶ Kodwana upha umusa ngokweqileko, ngalokho umtlolo uthi: “UZimu ujamelana nabazikhukhumezako, kodwana abazithobako ubapha umusa.”

⁷ Nje-ke zithobeni kuZimu, nijamelane noSathana, uzanibaleka.

⁸ Tjhidelani kuZimu naye uzakutjhidela kini. Hlambani izandla zenu nina zoni, nihlambulule iinhliziyo zenu nina beenhliziyo ezimbili.

⁹ Tshwenyekani, nidabuke, nilile; ukuhleka kwenu akuphenduke isililo nokuthaba kwenu kube kudana.

¹⁰ Zithobeni phambi kweKosi, yona-ke izaniphakamisa.

¹¹ Ningahlebani bazalwana. Loyo ohleba umzalwana namkha amgwebe umzalwana, uhleba umthetho, agwebe umthetho. Nangabe ugweba umthetho, awusuye umenzi womthetho, kodwana umugwebi wawo.

¹² Munye obetha umthetho, benguye omugwebi onamandla wokusindisa nokurhayila. Kodwana wena ungubani bona ungagweba umfowenu na?

Ukusolwa ngokuzikhukhumeza

¹³ Lalelani-ke nina enithi: “Namhlanjesi namkha kusasa sizakuya edorobheni leli namkha kileliya, sihlale umnyaka sirhwebe, sifumane inzuzo.”

¹⁴ Anilazi ikusasa. Alo, kuyini ukuphila kwenu na? Niyikungu evela ibonakale isikhatjhana bese iyanyamalala.

¹⁵ Yeke, kufuze nithi: “USomnini nakathandako, sizakuphila bese senza lokhu nalokhuya.”

¹⁶ Kunalokho niyazikhukhumeza ekuzigabaziseni kwenu; koke ukuzigabazisa okunjalo kumbi.

¹⁷ Okwaziko ukwenza okuhle ahluleke ukukwenza, uyona.