UJAKOPO 3 - IsiNdebele 2012 Translation

Ilimu

¹ Bazalwana, ningabi bafundisi abanengi ngombana niyazi bonyana thina esifundisako sizokugwetjwa khulu.

² Soke sineemphoso ezinengi; nangabe umuntu akaphosisi kilokho akutjhoko kutjho bona uphelele, uyakwazi ukubamba umzimba woke ngetomu.

³ Nasifaka amatomu emilonyeni yeenjomani bona zisilalele, sikghona ukunqophisa yoke imizimba yazo.

⁴ Akhese niqale nemikhumbi, nanyana imikhulu kangangani beyiragwe mimoya enamandla, nokho inqotjhiswa ngephinyana, inqombe lapha umtjhayeli afuna iye khona.

⁵ Linjalo-ke nelimu, lisisitho esincani kodwana lizigabazisa ngezinto ezikulu. Akhese niqale, umlilo omncani uthungela ihlathi elikhulu.

⁶ Ilimu nalo limlilo, liliphasi lokonakala ezithweni zomzimba wethu, lisilaphaza umzimba woke, lithungela yoke ipilo khisibe lona lithungelwa sirhogo.

⁷ Yoke imihlobo yeenlwana, yeenyoni, yeenrhurhubi neendalwa zelwandle iyathanjiswa, iye, ithanjiswa babantu,

⁸ kodwana akakho umuntu okwazi ukuthambisa ilimu; libubumbi obuyaluzako, lizele isihlungu esibulalako.

⁹ Ngalo sidumisa uSomnini uBaba, kuthi ngalo godu sinikelele abantu abenziwe ngomfanekiso kaZimu.

¹⁰ Emlonyeni owodwa kuphuma ukudumisa nokunikelela. Bazalwana, akukafaneli bona kube njalo.

¹¹ Kungenzeka bona emthonjeni owodwa kuphume amanzi amnandi nababako na?

¹² Bazalwana bami, kghani umuthi wamakhiwani uyathela iinthelo zama-oliva namkha isidiribe sithele amakhiwani na? Angeze kwenzeka bona umthombo onetswayi uveze amanzi amnandi.

Ukuhlakanipha okuvela ezulwini

¹³ Ngubani ohlakaniphileko nolemukako hlangana nani na? Ngepilo ehle akatjengise imisebenzakhe ngokuzithoba okunokuhlakanipha.

¹⁴ Kodwana naninomona obabako, nobumarhamaru eenhliziyweni zenu, musani ukuzikhakhazisa ngalokho, ningabi nobuqili eqinisweni.

¹⁵ Ukuhlakanipha okunjalo akuveli ezulwini kodwana kungokwephasi, kunobusathana

¹⁶ ngombana lapha kunomona nomrhobholo khona, kuzokuba khona ihlangahlangano nazo zoke izenzo zobukhohlakali.

¹⁷ Kodwana ubuhlakani obuvela ezulwini, kokuthoma nje bumsulwa, bunokuthula, bunobumnene, buthobekile, bunobubele neenthelo ezihle, abunakuzaza nokuzenzisa.

¹⁸ Isivuno sokulunga sitjalwa ngokuthula ngilabo abenza ukuthula.