UJAKOPO 2 - IsiNdebele 2012 Translation

Isiyeleliso ngokubandlululana

¹ Bazalwana bami enikholwa yiKosethu yephazimulo uJesu Krestu, ningabandlululi muntu.

² Nangabe kungena umuntu emhlanganweni wenu ofake idzilamunwana yegolide embethe zakanokutjho, kubuye kungene osichaka embethe maratha,

³ bese nitjheja loyo owembethe zakanokutjho ngokuthi “nasi isihlalo esihle esilungele wena”, komaratha nithi “jama lapha wena” namkha nithi “hlala phasi eenyaweni zami”,

⁴ ngokwenza njalo nizabe ningakabandlululi phakathi kwenu ngokuzenza abagwebi ngemikhumbulo emimbi na?

⁵ Lalelani bazalwana abathandekako: UZimu akakakhethi abachakileko bephaseli kobana banothe ngokukholwa, babe ziindlalifa zombuso awuthembisa labo abamthandako na?

⁶ Kodwana nina niyamrhubutjha ochakileko. Akusibo abanjingileko abanigandelelako bebanidosele phambi kwesigungu sababusi na?

⁷ Akusibo abahlambalaza ibizo elihle enibizwa ngalo na?

⁸ Kwamambala nizabe nenza okufaneleko nanilonda umthetho wobukhosi njengombana kutloliwe kwathiwa: “Thanda umuntu omunye njengombana uzithanda wena!”

⁹ Kodwana nanibandlululako, nenza isono begodu nilahlwa ngomthetho njengabaweqako.

¹⁰ Nangabe umuntu ulonda woke umthetho kodwana aphule munye wawo unomlandu wawo woke

¹¹ ngombana loyo owathi “ungahlobongi” wabuye wathi “ungabulali”. Nangabe awuhlobongi kodwana uyabulala, usiseqamthetho.

¹² Khulumani bese nenza njengalabo abazokugwetjwa mthetho oletha ikululeko

¹³ ngombana ukugweba akunasirhawu kiloyo ongazange abonise isirhawu, nokho isirhawu siyahlula phezu kwesigwebo.

Ukukholwa nemisebenzi

¹⁴ Bazalwana bami, kusizani umuntu athi unokukholwa kodwana anganayo imisebenzi na? Ukukholwa kwakhe kungamsindisa na?

¹⁵ Nakube umfo namkha udade ukhamba hlubule begodu akanakudla

¹⁶ bese omunye wenu athi kibo “khambani ngokuthula, nifuthumale, nisuthe”, lokho kusizani naninganikeli lokho okudingekako ngokomzimba na?

¹⁷ Ngokunjalo-ke, nokukholwa nakunganamisebenzi, kufile.

¹⁸ Kodwana omunye uzakuthi: “Wena unokukholwa, mina nginemisebenzi.” Ngitjengisa ukukholwa kwakho ngaphandle kwemisebenzi, nami ngemisebenzami ngizakutjengisa ukukholwa kwami.

¹⁹ Uyakholwa bona uZimu munye na? Wenza kuhle; namadimoni ayakholwa abe ahlengezele.

²⁰ Wena siyila ndina, ufuna ukutjengiswa bona ukukholwa ngaphandle kwemisebenzi kulilize na?

²¹ Kanti ukhokho wethu u-Abrahamu akhange alungisiswe ngemisebenzi lokha nakanikela ngo-Isaka indodanakhe e-aldarini na?

²² Uyabona-ke bonyana ukukholwa kwasebenza kanye nezenzo zakhe, nokobana ukukholwa kwapheleliswa ngemisebenzi.

²³ Nje-ke kwazaliseka umtlolo othi: “U-Abrahamu wakholwa kuZimu, kwabalelwa kuye njengokulunga,” begodu wabizwa bona umngani kaZimu.

²⁴ Niyabona bonyana umuntu ulungisiswa ngemisebenzi, ingasi ngokukholwa kwaphela.

²⁵ Kwaba njalo nangoRarhabu ingwadla, walungisiswa ngemisebenzi lokha nakamukela iinthunywa wabuye wazikhupha ngenye indlela.

²⁶ Njengombana nomzimba nawunganammoya ufile, ngokunjalo nokukholwa nakunganamisebenzi kufile.