UJAKOPO 1 - IsiNdebele 2012 Translation

Ukulotjhisa

¹ UJakopo, inceku kaZimu neyeKosi uJesu Krestu, ulotjhisa kizo zoke iinkoro ezilitjhumi nambili ezihlakazeke hlangana neziziwe.

Ukukholwa nobuhlakani

² Bazalwana, lokha nanehlelwa mihlobohlobo yeenlingo, nikuthathe ngokuthi lithabo lodwa,

³ ngombana niyazi bona ukulingwa kokukholwa kwenu kuveza ukunyamezela.

⁴ Ukunyamezela kwenu akuveze imisebenzi epheleleko khona nizakuba ngabavuthiweko nabapheleleko, ningatlhayeli ilitho.

⁵ Nangabe kukhona hlangana nani onganabo ubuhlakani, akabawe uZimu opha boke ngaphandle kokusola, uzakuphiwa.

⁶ Kodwana akabawe ngokukholwa, angazazi; ngombana ozazako ufana namaza welwandle aphetjhulwa mumoya.

⁷ Nje-ke onjalo angadlumbani bona iKosi izamamukelisa ilitho

⁸ ngombana uneenhliziyo ezimbili, uyaphenduphenduka eendleleni zakhe zoke.

Ubuchaka nomnotho

⁹ Umzalwana ophasi azibuke ngokuphakanyiswa kwakhe,

¹⁰ onjingileko azibuke ngokwehliswa kwakhe ngombana uzakunyamalala njengelikhwa emmangweni.

¹¹ Ilanga liyaphuma libalele litjhwabise ummango; amakhwa wakhona ayathintitheka nobuhle bawo bunyamalale. Kunjalo-ke nangenjinga, phakathi kwepilwayo izakwehlelwa kukhwahla.

Ukulingwa

¹² Ubusisiwe onyamezelako ekulingweni ngombana nasele aphumelele ekulingweni kwakhe, uzakwamukeliswa isihlohlo sokuphila iKosi eyasithembisa labo abayithandako.

¹³ Umuntu nakalingwako akukafaneli athi: “Ngilingwa nguZimu,” ngombana uZimu angekhe alingwa ngokumbi, begodu naye akalingi muntu.

¹⁴ Kodwana loyo naloyo ulingwa, adoswe ziinkanuko zakhe abe ayengeke.

¹⁵ Yeke ikanuko nasele ibambile, izala isono, kuthi isono nasele sikhulile sizale ukufa.

¹⁶ Bazalwana abathandekako, ningakhohliswa.

¹⁷ Zoke izipho ezilungileko nazo zoke iimphiwo ezipheleleko zivela phezulu; zehla zivela kuBaba wokukhanya okungekho kuye ukuhlanuka ngitjho nesithunzi esitjhugulukako.

¹⁸ Ngentando yakhe wasibeletha kabutjha ngelizwi leqiniso khona sizakuba mazibulo wazo zoke iimbunjwa zakhe.

Ukuzwa nokwenza

¹⁹ Bazalwana abathandekako, yelelani lokhu: Ngiloyo naloyo akarhabe ukuzwa kodwana angaphenduli msinyana, ariyade ukuthukuthela

²⁰ ngombana ilaka lomuntu alivezi ipilo yokulunga uZimu ayifunako.

²¹ Yeke lahlani izenzo zeensila nokuziphatha ngokukhohlakala; ngokuzithoba namukele ilizwi elitjalwe ngaphakathi kwenu elinganisindisa.

²² Yibani ngabenza ilizwi, ningabi ngabalizwako kwaphela bese niyazikhohlisa.

²³ Loyo olalela ilizwi kodwana angenzi elikutjhoko ufana nomuntu oqala ubuso bakhe esibonibonini,

²⁴ kuthi ngemva kokuziqala, asuke akhambe akhohlwe bona gade anjani.

²⁵ Kodwana oqalisisa emthethweni opheleleko nowetjhaphuluko, akhambe ngawo, angabi mlaleli okhohlwako kodwana abe ngowenzako, loyo-ke uzakuba ngobusisiweko ekwenzeni kwakhe.

²⁶ Umuntu odlumbana bona ulikholwa kodwana angalibambi ilimu lakhe, uyazikhohlisa ehliziywenakhe nokukholwa kwakhe kulilize.

²⁷ Ukukholwa okumsulwa nokungikho phambi kwakaZimu onguBaba ngilokhu: kukhambela iintandani nabahlolokazi ekubandezelekeni kwabo nokuzilonda ungasilaphazwa liphasi.