UHOSIYA 9 - IsiNdebele 2012 Translation

Umphorofidi utjhumayela emnyanyeni wokuluma

¹ Ungathabi wena Israyeli! Ungajekezeli njengezizwe ezinye ngombana azange uthembeke kuZimakho: Wakhamba unghatulela aboBhali, uthabela abakupha khona eselelweni esinye nesinye.

² Izelelo neentlhodlhelo zizakuba dududu, kungabi newayini elitjha.

³ Abantwaba abazukuhlala enarheni kaSomnini; U-Efrayimu uzakubuyela eGibhide nanyana adle ukudla okuzilwako e-Asiriya.

⁴ Abantwaba abazokuletha amaqatheko kuSomnini nemihlabelo yabo abazoyiletha kuye. Koke ukudla kwabo kuzakuba ngokuzilwako njengokudla okudliwa esililweni. Lokho kuzakuba kukudla okusuthisa bona; akuzukulethwa endlini kaSomnini.

⁵ Nizobe nikuphi ngelanga leminyanya ezako, ngelanga lemigidi kaSomnini na?

⁶ Abazakuphunyurha ekurhayilweni, iGibhide izababutha, bangcwatjwe eMemfisi. Umnothwabo wesiliva uzakuvalwa likhula, ngeendlini kumile umtjhatjhana.

⁷ Amalanga wokuhlunguphazwa afikile; amalanga wokulungisa afikile! U-Israyeli uzazizwela. Nithi: “Umphorofidi udlhayele, umuntu kaZimu uyarhapha!” Vele unjalo, wenziwa zizonokazi zenu ezinengezi, nobutha benu obesabekako!

Umphorofidi uziphendulela ngokumangalelwa kwakhe babantu

⁸ Ukuya ngentando kaZimu wesivumelwano umphorofidi ulilihlo phezu kwaka-Efrayimu, kodwana ubekelwe izifu ngandlela zoke nendlini kaSomnini kunobutha;

⁹ benzele umphorofidi umlindi ozikileko. Njengemalangeni weGibeya uSomnini uzobalalamela ngokukhohlakala kwabo bese ubahlunguphaza ngebanga lezono zabo.

U-Efrayimu uzakutlhoga abalandeli

¹⁰ USomnini uthi: “Ngathabela ukufunyana u-Israyeli njengomuntu ofunyana amadiribe erhalawumbeni. Mhla ngithoma ukubona aboyihlomkhulu ngaba njengomuntu othabela ukufunyana uporwana wokuthoma wefeyi emthini. Kodwana bona baya kuBhali wePeyori bafese bazinameka entweni edanisako leyo; banyenyeka njengentwabo abayithandako leyo.

¹¹ Idumo laka-Efrayimu linyelele, lemuke njengenyoni; kungabikhona ukubeletha, ukuzithwala nokubamba.

¹² Iye, nabantwana ababakhulisako ngizobamuka bona kungasali ngitjho noyedwa. Bazazizwa mhlana ngibafulathelako.

¹³ “U-Efrayimu ngimbone anjengomuthi wesundu otjalwe endaweni ehle. Kodwana u-Efrayimu uzokukhuphela abantwabakhe umbulali.”

¹⁴ Somnini, baphe lokho ofuna ukubapha khona: Ubaphe isibeletho esirhululako, ubaphe amabele anganamkghado.

¹⁵ USomnini uthi: “Boke ubukhohlakali babo bathoma eGiligali. Lapho-ke ngabalandula ngebanga lezenzo zabo. Ngizobaqotjha endlinami, angisazobathanda. Boke ababusi babo bamaphikakani.

¹⁶ “U-Efrayimu umanyiwe, ipandakhe ibunile; akazukuhloma isithelo. Nanyana abeletha, ngizosibulala isizukulwana sakhe esithandekako.”

¹⁷ UZimu wesivumelwano uzobafulathela ngombana akhange bamlalele. Bazoba bozulani hlangana nezizwe.