UHOSIYA 8 - IsiNdebele 2012 Translation

Ubukhali bakaZimu ngokulotjha iinthombe

¹ USomnini uthi: “Vuthelani ipalapala! Nanti idlanga lizulazula ngehla kwendlu kaSomnini ngombana abantu bephule isivumelwano sami, bavukela umyalwami.

² Bayangililela bathi: ‘Maye, Sivumelwano sethu, thina, Israyeli, sinetjhebiswano nawe!’

³ Kodwana u-Israyeli ulahle okuhle; nje-ke isitha siseenthendeni zakhe.

⁴ Bazibekela amakhosi ngingakatjho, bazikhethela ababusi ngaphandle kwemvumo yami. Bazenzela iinthombe ngesiliva nangegolide labo, kube kubhujiswa kwalo!

⁵ Ithole lakho, Samariya, liyangikghabhudlha! Ubukhali bami buyavutha phezu kwabantwaba. Kuzabe kube nini soloko babhalelwa kuphila msulwa

⁶ nayibe bangu-Israyeli? Itholeli libunjwe sithakgha, senguzimu nje. Yeke lizokwephulwa libe ziinquqwana ithole leSamariyelo.

⁷ “Otjala ummoya, uvuna isiwuruwuru. Ihlanga nalinganasiqwambe angeze laba nokudla. Nabe belingaba nokudla, imiqhamuka beyizakurhiribidela.

⁸ U-Israyeli urhiribidelwe; sese afana namawunguwungu hlangana nezizwe ezinye

⁹ ngombana ababusi bakhona bafuna isizo e-Asiriya. Kodwana u-Efrayimu ufana nodumbana ozulazula emmangweni afuna abangani.

¹⁰ Nanyana angafunyana abangani hlangana nezizwe, akazokuba nobuyo ngombana ngizobabuthelela ndawonye. Masinyana bazakubhesiswa mthwalo wekosi ekulu.

¹¹ “Lokha u-Efrayimu nakakha ama-aldari amanengi weminikelo yesono, aphenduka ama-aldari wokona.

¹² Nanyana bengingabatlolela kanenginengi ngomthethwami, bebazawuthatha inga yinto etjhili.”

¹³ Benza imihlabelo eyanelisa izisu zabo, bazidlela inyama nje. USomnini akayamukeli imihlabelo enjalo. Nje-ke uSomnini uzobalalamela ngokukhohlakala kwabo, bese ubahlunguphaza ngebanga lezono zabo: Bazakubuyela eGibhide.

¹⁴ U-Israyeli ukhohlwe uMdalakhe, wazakhela iingodlo. UJuda ubiyele amadorobho amanengi. Kodwana uSomnini uzokuthumela umlilo emadorobhenabo bese urhayila iingodlo zabo.