UHOSIYA 7 - IsiNdebele 2012 Translation

¹ iye, nangithi ngipholisa u-Israyeli, izono zaka-Efrayimu zivela emtarini, kwembuleke ikohlakalo yeSamariya: Bayakhohlisana, amasela ayagqekeza angene ebe; imigulukudu idlelezela eendledlaneni!

² Abe abacabangi bonyana yoke ikohlakalwabo ngiyayikhumbula; izenzo zabo ziyabalandela, azikafihleki kimi.

³ Ikosabo iyabathabela ngokuyibeka kwabo ngekohlakalo; nababusi bayo bayathokoza ngamangabo.

⁴ Boke abathembeki. Banjenge-ondo yomlilo etjhisako, ongafuni umbhagi awukhwezelele, kusukela ekubhicweni kwehlama bekube sekukhukhumaleni kwayo.

⁵ Ngelanga lomnyanya wekosi yaphambilini benza ababusi bayo badakwe liwayini, abeluleki badakwa bafa.

⁶ Ngapha bakhothamela ikosi, ngapha iinhliziyo zitjhisa njenge-ondo ngamaqhinga wokujamelana nekosi. Ilunya labo linjengethuthu lomlilo ebusuku ekuseni libhebhedlhe njengelangabi lomlilo!

⁷ Boke batjhisa njenge-ondo, baqothula ababusi babo. Woke amakhosabo ayawa. Akakho noyedwa ongibizako.”

Kuphelile ngo-Efrayimu

⁸ USomnini uthi: “U-Efrayimu uhlangana nezizwe ukiniywa ngapha nangapha. U-Efrayimu sese afana nehlama engakaphendulwa phezu komlilo.

⁹ U-Efrayimu ukghakghathwe miqhamuka, kodwana yena akakuboni lokho. Sese akhunile, kodwana yena akakuboni lokho.

¹⁰ “Ukuzikhukhumeza kwaka-Israyeli kujamelene naye. Akhange babuyele kuSomnini uZimabo nanyana bamfune phezu kwakho koke lokho.

¹¹ “U-Efrayimu sese anjengezuba, uyengeka lula, uthithibele: Balilela iGibhide, kodwana babalekela e-Asiriya!

¹² Kuzakuthi basabaleka njalo, ngiphose igolanedami phezu kwabo; ngizabadosela phasi njengeenyoni zomkayi; ngibabambe njengothiya iwoma lamazuba.

¹³ “Bazazizwa ngombana bangihlanukile! Bazakurhayilwa ngombana balwa nami! Ngesingami bengikhanukela ukubahlenga, kodwana bayangirhwayela.

¹⁴ Akhange balile kimi ngeenhliziyo zabo, kodwana barhahlawula isililo basemibhedenabo. Bazirhaya ngebanga lekoroyi newayini.

¹⁵ Bayangihlubuka nanyana ngabakhalima. Ngabaqinisa kodwana bahlala isicathana ngami.

¹⁶ Baphendukela elizeni, baba njengomsebe omtepetepe. Ababusi babo bazokubulawa ngesabula ngebanga lokwephula kwabo iimfungo zabo. Bazakuba yihlekisa nesiphoqo enarheni yeGibhide.”