UHOSIYA 5 - IsiNdebele 2012 Translation

Abarholi bakwa-Israyeli bayagwetjwa

¹ “Lalelani lapha nina baphristi! Yelelani nina baphathi bakwa-Israyeli! Ulalele wena Sigodlo! Isigwebo ngesenu: Nibe sisifu eMitsipha, Naba sigolanede eThabhori:

² nibe mlindi ozikileko eSitimu. Kodwana ngizonikhalimela noke.

³ Ngazi koke ngo-Efrayimu; u-Israyeli akakafihleki phambi kwami. Ngebanga lokobana wena Efrayimu, sewuphendukele ebungwadleni, u-Israyeli wonakele.” Kutjho uSomnini.

⁴ Izenzo zabo azibavumeli ukubuyela kuZimabo. Abamazi uSomnini ngebanga lommoya wobungwadla ophakathi kwabo.

⁵ Ukuzikhukhumeza kuka-Israyeli kujamelene naye. Ama-Israyeli ngitjho no-Efrayimu bararejwa zizono zabo; uJuda unyandanye nabo:

⁶ Lokha nabatlhetlha nezimvu nomhlambi wabo bathi bafuna uSomnini, abazomfunyana ngombana uSomnini uzihlukanisile nabo.

⁷ Abathembeki phambi kwakaSomnini, babeletha amavezandlebe. Nje-ke, uSomnini uzobatjhabalalisa ngenyanga eyodwa nje; kuzabe kungasenalitho emasiminabo.

Ipi hlangana kwakaJuda no-Israyeli

⁸ Vuthelani ipalapala eGibiya! Nivuthele iporompita eRama! Hlabani umkhosi eBhethe-Aveni! UBhenjamini useenthendeni zakho Efrayimu.

⁹ Nje-ke uzokutjhabalaliswa ngelanga lokubuyiswa. Ngikhuluma into ekhona hlangana neenkoro zakwa-Israyeli.

Umgomo obhidlizako waka-Efrayimu noJuda

¹⁰ USomnini uthi: “Ababusi bakwaJuda batjhidisa iinkhonkhwani. Ngizabadlhuwelela ngobukhali bami njengeenrhurhula zamanzi.

¹¹ U-Efrayimu utjhaphile ngokweqa umyalo ngombana uhlalele ukulandela amanyela.

¹² Mina nginjengepehli ku-Efrayimu, njengesidliso endlini kaJuda.

¹³ Lokha u-Efrayimu nakezwa ukugula kwakhe, noJuda nakabona inceba lakhe, yeke u-Efrayimu waphendukela e-Asiriya, wabawa isizo ekosini ekulu. Kodwana abe ayinamandla wokunelapha, nokunipholisa emancebenenu.

¹⁴ Ngambala mina nginjengengwenyama ku-Efrayimu, nginjengengwenyama enamandla endlini kaJuda. Mina ngiyarathurathula bengikhambe; ngidudula kutlhogeke nomenyeli.

¹⁵ Yeke ngizakubuyela endawenami ngilinde bebavume umlandwabo. Bazakufuna ubuso bami; esizini labo bazangifuna bebangifunisise.”