UHOSIYA 2 - IsiNdebele 2012 Translation

¹ Yithini kubafowenu “Bantu bami”, kibodadwenu nithi “Thandiwe”.

Umphorofidi utlhala uGomere phambi kwabagwebi

² “Mangalelani unyoko, nimmangalele ngombana akasese mkami, nami angisese myenakhe! Ubangakameli ukuba namehlo amanengi nokuqoqoma.

³ Nakungasinjalo bekumele ngimhlubulise abe bhunubhunu njengamhlana abelethwako. Bengizamenza abe njengerhalawumba, athunye njengebhudu, ngimbulalise ngokoma.

⁴ Bengingazukuba nesirhawu ebantwaneni bakhe ngombana babantwana bokonakala.

⁵ Unina wathuwelela ngobungwadla, wabamitha ngehlazo. Nje-ke umfazi lo wathi: ‘Ngizakulandela iinthandwa zami ezingipha ukudla kwami namanzami, zingembathise ngezoboya nelineni, zingiphe namagugwami’.

⁶ Yeke ngaqeda ngokuthi: Ngizakubiyela isivande samesi ngomunga nangomthangala wamatje. Nangenza njalo amaqhingakhe azakufelela:

⁷ Iinthandwa zakhe azilandelelako zingameyami, azifune angazifunyani. Khona-ke uzakuqaquluka athi: ‘Awa-yeke, angibuyele kusobentwana ngombana bekangiphethe kuhle.’

⁸ Khonapho umfazi lo akhange avume bonyana ngimi omondla ngamabele, ngewayini nangamafutha we-oliva. Bengamtotosa ngemali enengi nangegolide (abalisebenzisa ukubumba isithombe sakaBhali).

⁹ Nje-ke, ngiseqhingeni lokobana ikoroyi newayini abaseze ayifunyana kimi nakuvunwako le, ngimdime kwanjesi. Nezambatho zoboya nezelineni ebengimupha zonezi, ngizamemuka akhambe bhunubhunu.”

Isigwebo somfazi, okutjho u-Israyeli

¹⁰ “Nje-ke ngizomhlubulisa phambi kweenthandwa zakhezo, abe atlhoge nomenyeli.

¹¹ Ngizakuphelisa koke ukuzithabisa kwakhe: kweminyaka, kweenyanga nekwamalanga. Iye, ngiphelise yoke iminyanyakhe.

¹² Ngizakutjhabalalisa isidiribe namakhiwanakhe athe ngawo: ‘Yikokhelo iinthandwa zami ezingikhokhela ngayo.’ Ngenze isimakhe ifukufuku bese idliwa ziimbandana zommango.

¹³ Ngizamhlawulisela amalanga agade atjhisela ngawo aboBhali itjhwalo: Amalanga azimomonda ngawo ngobuphaziphazi, walandelana neenthandwa zakhe. Kodwana mina wangikhohlwa.” Kutjho uSomnini.

Iinkulumo ezihlukahlukeneko ngelikusasa lama-Israyeli

¹⁴ “Nakanjani ngizamsomasoma, ngimdosele erhalawumbeni, ngikhulume naye kuhle.

¹⁵ Ukusuka lapho ngizambuyisela isidiribe sakhe, ngenze nomrhoba we-Akori isango lethemba. Lapho-ke uzangilalela njengalokha nasesemutjha, njengamhlana aphuma eGibhide.”

¹⁶ USomnini uthi: “Mhlokho uzangibiza uthi ‘babakwami’; ungasathi ‘Bhalami’.

¹⁷ Ngizamkhafulisa amabizo waboBhali emlonyenakhe, angabe asawabiza.

¹⁸ “Mhlokho ngizakwenzela u-Israyeli isivumelwano neembandana zommango, neenyoni zezulu, neenrhurhubi zephasi. Ngizakwephula imisubela neensabula, neenhlabano zoke zepi enarheni, ukuze nibe nokuphumula nokuthula.

¹⁹ “Ngizakuthatha ube mkami isikhathi soke. Ngikuthathe ube mkami ngikusize, ngikuvikele; ngithembeke bengikurhawukele kube sisipho sami kuwe.

²⁰ Ngikuthathe ube mkami weenkomo, ube netjhebiswano noSomnini.”

²¹ USomnini uthi: “Mhlokho ngizakuphendula; Ngiphendule izulu, izulu liphendule iphasi.

²² Iphasi liphendule ikoroyi, isidiribe namafutha we-oliva; zona-ke zizakuphendula uJizriyela.

²³ Ngizazitjalela yena enarheni. Ngirhawukele uLo-Rurhama, ngithi kuLo-Ami ‘Bantu bami’, bese bona bathi ‘Zimethu’.”