UHOSIYA 14 - IsiNdebele 2012 Translation

Ama-Israyeli abizelwa ekuvumeni izono zawo

¹ Buyela kuSomnini uZimakho, wena Israyeli ngombana izono zakho zikurarejile.

² Buyelani kuSomnini, nivume izono zenu nithi: “Somnini, silibalela zoke izono zethu, wamukele ukuvuma kwethu. Sithanda ukunikela ngeenthelo zomlomethu.

³ I-Asiriya angeze yasisiza; asisazokuthembela eenjomaneni zepi; angeze besisatjho sithi ‘zimethu’ entweni esiyenze ngezandla zethu ngombana kuwe wedwa nentandani ifunyana isirhawu.”

Ipendulo kaSomnini

⁴ “Ngizakupholisa ukuhlubuka kwabo, ngibathande ngomusa. Njengombana ukusilingeka kwami kungasekho kibo,

⁵ ngizakufana nombethe ku-Israyeli; yena athuthumbe njengamakhwa. anabise imirabhakhe ekuzikeni, adzimelele njengeLibhanoni;

⁶ amahlumelakhe azakukhula. Uzakuphazima njengomuthi we-oliva, onuka kamnandi njengehlathi leLibhanoni.

⁷ Abantu ebebahlala emthunzinakhe bazakubuya godu batjale ikoroyi. Bazakutlhurha banabe njengesidiribe. Idumo laka-Israyeli libe njengewayini leLibhanoni.

⁸ Efrayimu, uthi nginandabani nje neenthombe ezibaziweko? Ngimi owakuthobisako, kodwana ngizakutjheja. Ngifana nomuthi ohlala uhlaza, ukuphumelela kwakho kubuya kimi.”

Isiphetho

⁹ Ohlakaniphileko uzayihlatha ikulumo le, onengqondo uzakulemuka; ngombana iindlela zakaSomnini zinqophile. Abalungileko bakhamba kizo, kodwana abaphika ikani ziyabarareja.