UHOSIYA 13 - IsiNdebele 2012 Translation

¹ Bekuthi lokha u-Efrayimu nakhulumako amadoda atatazele; gade ahlonitjhwa tle kwa-Israyeli. Wazenzela umlandu ngokulotjha uBhali, wafa.

² Khonapho abantu bathuwelela ngokona: Bazenzela iinthombe, abosingazimu ababazwe ngesiliva labo okumsebenzi nje owenziwe sithakgha! Ngeenthombezi bathi: “Abantu abenza umhlabelo bamele bancwange amathole la.”

³ Yeke bazakufana nekungu yamasa, bafane nombethe wekuseni othintithekako; babe njengomkhwani ophephuka eselelweni, nanjengentuthu ephutjheza entunjeni.

U-Israyeli ufaniswa nomhlambi wezimvu

⁴ USomnini uthi: “NginguSomnini uZimakho kusukela emihleni yeGibhide. Akhange wazane nomunye uzimu ngaphandle kwami begodu azange kube nomunye umsindisi ngaphandle kwami.

⁵ Ngakwelusa nawuserhalawumbeni, enarheni yesomiso.

⁶ Kwathi lokha nabafika emadlelweni, badla bebatatamala iziswanezi. Kuthe nasele zitatamele njalo, bazikhukhumeza; kungebangelo bangikhohlwa.

⁷ Nje-ke ngaba njengengwenyama kibo, ngabalalela endleleni njengengwe.

⁸ Ngizabathelekela njengonomrhaso owemukwe abantwabakhe: Ngibatlhatlhamulule iimfutjanezi. Ngizabarhiribidela njengengwenyama; iimpisi zizabarathurathula.

⁹ Ukubhubha kwakho, wena Israyeli, kungebanga lami; mina msizakho.

¹⁰ Iphi ikosakho-ke nje, izakukusindisa kiwo woke amadorobhakho na?

¹¹ Ngininikela ikosi ngisilingekile, ngibuye ngiyisuse ngobukhali bami.”

Ukufa kusemnyango

¹² USomnini uthi: “Umlandu waka-Efrayimu ubulungiwe, izono zakhe zitloliwe.

¹³ Nakufika iinhlabi zokubeletha, u-Efrayimu uba mntwana odlhayeleko: Nakufika isikhathi uyarhodobala, angaphumi esibelethweni!

¹⁴ Ngimsindise emandleni wethuna na? Ngimhlenge ekufeni? Kufa ndina, aphi amanikelelakho? Thuna ndina, kuphi ukubhubhisa kwakho? Angeze ngamrhawukela.

¹⁵ Nje-ke akazukuwadla amabele nabafowabo.” Ummoya wepumalanga ovela kuSomnini, uzakufika, uvuke erhalawumbeni; isiyalu saka-Efrayimu sizakuvaleka nomthombakhe wome kere. Ummoya lowo uzakuhlakaza woke amagugwakhe.

¹⁶ ISamariya izazithwalela umlandwayo ngombana ihlubuke uZimayo. Abantu bazakubulawa ngesabula; abantwababo bazakuphihlizelwa ehlabathini, besifazana babo abasebantwini batlhatlhamululwe!