UHOSIYA 12 - IsiNdebele 2012 Translation

¹ “U-Efrayimu uzondla ngommoya, udlhemadlhema ngemva kommoya wepumalanga imini yoke. Ngamangakazakhe amanengi uzibangela ukubhujiswa: Wenza isikhozi ne-Asiriya, khibe ngapha ukhungana neGibhide ngamafutha we-oliva.”

² USomnini umangalela uJuda; uzokuhlunguphaza uJakopo ukuya ngeendlela zakhe, ambethe ngeentonga zakhe.

³ Nasesemanzi uJakopo wabamba isithende sakamfowabo; nasele aqinile wabindana noZimu.

⁴ Wabinda ingilozi bewayihlula. Walila, warabhela uSomnini. Nje-ke iinzukulwana zakhe zithi: “EBhethele uSomnini uzosihlangabeza, abuyelele iinthembiso zakhe nakithi

⁵ ngombana uSomnini unguZimu uMninimandlawoke, okulibizo lakhe uSomnini adume ngalo.”

⁶ Awa Israyeli, kuzakufanela bonyana ubuyele kuZimakho: Thembeka ubulunge imiyalwakhe; uthembele kuZimakho ngeenkhathi zoke.

⁷ U-Efrayimu unjengomthengisi osebenzisa isilinganiso samanga, uthanda tle ukudlelezela.

⁸ Kodwana u-Efrayimu uzibetha isifuba uthi: “Nginjinge tle; umnotho lo, ngizifunyanele wona mina. Ngomnothwami ongaka lo, abe akunamuntu ongafunyana isiphosiso esingako inga sisono.”

⁹ Nje-ke uSomnini uthi: “NginguSomnini uZimakho kusukela emihleni yeGibhide; kodwana ngizakukwenza ubuyele ematendeni godu njengerhalawumbeni.

¹⁰ “Ngakhuluma nabaphorofidi, ngabanikela imibono eminengi bengakhuluma imifanekiso ngabo.”

¹¹ BakwaGiliyadi nabo gade banjingile, kodwana babhujiswa! Abantu benza imihlabelo yeenkunzi eGiligali, nokho akhange kusize litho: ama-aldarabo aba njengesiqotjana samatje magegana nesimu.

¹² UJakopo wabalekela enarheni ye-Aramu, u-Israyeli wasebenza nzima nazakuthatha umfazi; wamlobola ngokwelusa izimvu.

¹³ USomnini wasebenzisa umphorofidi ukukhupha u-Israyeli eGibhide, iye, wabahlenga ngomphorofidi.

U-Efrayimu ufanelwa kukufa

¹⁴ U-Efrayimu uqhukuluze uSomnini okusilingako; iKosakhe-ke izamthwesa umlandu beyimhlawulise ngokuyirhubutjha kwakhe.