UHOSIYA 10 - IsiNdebele 2012 Translation

Izono zaka-Israyeli

¹ U-Israyeli ube sidiribe esimrarela; isithelo sakhe sanda. Isithelo sakhe nasilokhu sanda, wakha ama-aldari amanengi. Inarhakhe nayilokhu iphumelela, wakghabisa amatjakhe akhethekileko.

² Bavuma imilandwabo ngeenhliziyo ezinobuqili, kodwana uSomnini uzakubhidla ama-aldarabo, abe ahlakaze namatjabo akhethekileko.

³ Yeke bathi: “Thina abesinakosi nasinje ngombana sibhalelwe kuhlonipha uZimethu. Njekhona ikosi leyo, beyizasenzelani nje?”

⁴ Bakhuluma umonyani, bafunga amanga lokha nabenza iimvumelwano. Kodwana ukulunga kuzakuqubuka njengekhula elimila esimini elinyiweko.

⁵ Abantu beSamariya bagugunwa yindaba yethole leBhethe-Aveni. Abalotjhi balo bayalililela, nabaphristi ababalotjhi balo bayabubula – babubula ngomnothwalo ngombana lisiwe ekuthunjweni.

⁶ Lizokuthathwa lisiwe e-Asiriya libe sibiko sekosi ekulu yakhona. U-Efrayimu uzakurhubutjhwa; u-Israyeli abe neenhloni nabosingazimu bakhe beengodo.

⁷ Lokha iSamariya nayibhujiswako, ikosayo izakufana nesigodo esipapamele emanzini.

⁸ Iindunduma zobukhohlakali, okusisono saka-Israyeli, zizakubhidlizwa. Kuzakumila ameva nabosotokolo bathi talala phezu kwama-aldarabo. Yeke bazokuthi eentabeni: “Sigubuzesani!” bese bathi emibundwini: “Sigirikelani!”

⁹ Kusukela emihleni yeGibeya, u-Israyeli soloko uyona; sese athuwelele. Kazi ipi ayizukuwafunyana amaphikakani weGibeya na?

¹⁰ USomnini uthi: “Ngiqede ngokuthi, ngizabahlunguphaza, ngenze izizwe zibahlanganyele, zibabophe ngebanga lezonokazi zabo ezinengi.

¹¹ “U-Efrayimu lithodlana elibanduliweko nelithanda ukubhula amabele. Yeke ngaqeda ngokuthi angibeke ijogi phezu kwentanyanakhe ehle le. Ngizakubophela u-Efrayimu, uJuda alime, bese uJakopo uphadlha amagade.

¹² Bengithi, ‘Zitjaleleni ukulunga, khona nizakuvuna isithelo sokwethembeka; bese nizikghemela ihlabathi engakalinywa ngombana kusikhathi sokufuna uSomnini, abe afike anise ukulunga phezu kwenu.’

¹³ Kodwana nirhatjhe ubukhohlakali, navuna ubumbi; nje-ke nigome isithelo sekohliso. Ngombana fenathembela emaqhingenenu nemabuthwenenu amanengi,

¹⁴ umdumo wepi uzokusahlela isizwe senu kubhidlike woke amarholwenu. Kuzakuba njengamhlana uSalamani abhidliza iBhethe-Aribele: ngelanga lepi mhlana abomma nabantwababo baphihlizelwa ehlabathini.

¹⁵ USalimani uzanenza soneso eBhethele, ngebanga lobukhohlakali benu obukhulu. Ngokusa kwamhlokho, ikosi yakwa-Israyeli izabe seyabhujiswa nya.”