UHOSIYA 1 - IsiNdebele 2012 Translation

Isingeniso

¹ Ilizwi lakaSomnini elafika kuHosiya umsa kaBheri, ngeenkhathi zokubusa kwaka-Uziya, uJotamu, u-Arhazi noHezekhiya amakhosi wakwaJuda nangeenkhathi zokubusa kwakaJerobhowamu umsa kaJowatjhi ikosi yakwa-Israyeli.

² Isingeniso samezwi akhulunywa nguSomnini ngoHosiya. USomnini wathi kuHosiya: “Khamba uyokuthatha umfazi oyingwadla nabantwana bokonakala ngombana inarha itjhiye mina Somnini yayokungwadla.”

Ukwaliwa kwabarholi bakwa-Israyeli

³ Waya-ke umphorofidi wafese wathatha uGomere, indodakazi kaDibilayimu; wazithwala wambelethela umntwana womsana.

⁴ Yeke uSomnini wathi kuHosiya: “Mthiye bona nguJizriyela ngombana msinyana ngizakuhlunguphaza indlu kaJehu ngebanga lokuphalaka kweengazi eJizriyela, bengiphelise ubukhosi bendlu yakwa-Israyeli.

⁵ Kuzakuthi mhlokho ngephule umkhonto ka-Israyeli ngemrhobeni weJizriyela.”

⁶ UGomere wazithwala godu, wabeletha indodakazi. USomnini wathi kuHosiya: “Mthiye bona nguLo-Rurhama ngombana angeze ngisarhawukela indlu ka-Israyeli ngokuyithethelela.

⁷ Nakuyindlu kaJuda ngizayirhawukela; ngiyisindise. Ngingayisindisi ngeenhlabano, ngepi nanyana ngeenjomani nabakhweli bazo, kodwana ngiyisindise ngokwami mina Somnini uZimayo.”

⁸ UGomere selakhumule uLo-Rurhama ebeleni, wazithwala godu wabeletha umsana.

⁹ USomnini wathi kuHosiya: “Mthiye bona nguLo-Ami ngombana anisese babantu bami, nami angisenasivumelwano nani.”

Iinthembiso zakaSomnini zisese njengokuba kuma-Israyeli

¹⁰ Nokho isibalo sama-Israyeli sizakufana nehlabathi yelwandle engalinganisekiko nengabalekiko. Esikhundleni sokobana kuthiwe “Anisese babantu bami”, sele kuzakuthiwa “nibantwana bakaZimu ophilako”.

¹¹ Abantu bakwaJuda nebakwa-Israyeli bazakuhlanganiswa, bakhethe umrholi munye bebathumbe inarha. Ngambala lizaba likhulu ilanga leJizriyela.